2022-ci il iyunun 22-də Dövlət İmtahan Mərkəzi (DİM) Azərbaycan Dövlət İqtisad Universiteti (UNEC), Bakı Mühəndislik Universiteti (BMU), Xəzər Universiteti, Azərbaycan Texniki Universiteti (AzTU), Mingəçevir Dövlət Universiteti (MDU) və Azərbaycan Dövlət Aqrar Universiteti (ADAU) ilə maliyyə sahəsində savadlılığın artırılması, maliyyə, mühasibat və audit ixtisasları üzrə fənn proqramları, tədris planları və daxili semestr imtahanlarının təkmilləşdirilməsi, beynəlxalq və yerli kvalifikasiyalara uyğunlaşdırılması məqsədilə anlaşma memorandumu imzalayaraq, rəsmi əməkdaşlığa başlayıb.
Tədbirdə Xəzər Universitetindən rektor İradə Xəlilova və İqtisadiyyat və menecment fakültəsinin dekanı Ceyhun Məmmədov iştirak etmişlər.
Tədbirdə çıxış edən DİM-in Direktorlar Şurasının sədri Məleykə Abbaszadə ali təhsil müəssisələrinin əməkdaşlıq üçün göstərdiyi marağı yüksək qiymətləndirib və bu razılaşmanın tələbələrin həm nəzəri biliklərə, həm də praktik bacarıqlara daha dərindən yiyələnmələri istiqamətində müstəsna rol oynayacağını qeyd edib.
Sədr PMS imtahanlarının IFAC (Beynəlxalq Mühasiblər Federasiyası) standartlarına uyğunlaşdırılması, PMS-ə sahib şəxslərin ACCA-nın müvafiq kvalifikasiyalarından azad olması mexanizmləri, peşəkar inkişaf proqramlarının hazırlanması və sertifikasiya prosesi ilə inteqrasiyası kimi məsələlərə toxunub. O, həmçinin DİM tərəfindən keçirilən PMS imtahanları haqqında statistik məlumatlar təqdim edib, DİM-in Maliyyə Nazirliyi, peşəkar mühasib təşkilatları və tədris mərkəzləri ilə əməkdaşlığını xüsusi vurğulayıb.
Tədbirdə ACCA-nın Türkiyə Regional Mərkəzinin nümayəndəliyinin iştirakı xüsusilə qiymətləndirilib və Filiz Demiröz bu əməkdaşlığın əhəmiyyəti, eləcə də ACCA kvalifikasiyalarının yaratdığı imkanlar barəsində danışıb.
Görüşdə çıxış edən ali təhsil müəssisələrinin rektorları, o cümlədən Xəzər Universitetinin rektoru İradə Xəlilova da razılaşmanın tərəflər üçün faydalı olacağını, universitetlər tərəfindən ciddi addımların atılmasına zəmin yaradacağını, mühasibatlıq sahəsində tədris zamanı praktiki vərdişlərin mənimsənilməsində, eyni zamanda, beynəlxalq mühasibatlıq standartlarının tətbiqi ilə bağlı əməkdaşlığı dərinləşdirəcəyini qeyd ediblər.
Qeyd edək ki, DİM-in ali təhsil müəssisələri ilə imzaladığı memorandumlar DİM və ACCA arasındakı anlaşma memorandumundan irəli gələn fəaliyyətlərin icrasına da töhfə verəcək.
AZƏRTAC və ölkənin digər xəbər agentlikləri və portalları tədbir haqqında geniş xəbər yayımlamışlar.
Copyright © Xəzər Universiteti, 2025
