2022-ci il iyunun 13-14-də Erasmus+ Mübadilə proqramı çərçivəsində Portuqaliyanın Braqança Texniki Universitetinin (İnstituto Politécnico de Bragança) üç professoru - Nuno Adriano Baptista Ribeiro, Hélder Gomes və Getúlio Igrejas Xəzər Universitetində oldular.

Proqramın ilk günündə nümayəndə heyəti ilə Beynəlxalq əlaqələr üzrə prorektor Vlad Vernygora, İqtisadiyyat və menecment fakültəsinin dekanı Ceyhun Məmmədov və Təbiət elmləri, sənət və texnologiya yüksək təhsil fakültəsinin dekanı Səidə Şərifovanın görüşü oldu. Görüşdə növbəti əməkdaşlıq imkanları müzakirə olundu.

Təbiət elmləri və mühəndislik fakültəsinin dekanı Fəxrəndə Əlimardanovanın rəhbərliyi ilə qonaqlar universitetin laboratoriyaları ilə tanış oldular. Bundan əlavə, heyət Xəzər Universitetində davam edən “Creative Spark” layihəsinin konfrasında da iştirak edib. Sonda isə Kitabxana İnformasiya Mərkəzinin direktoru Tatyana Zaysevanın rəhbərliyi ilə kitabxana ilə tanışlıq görüşü olmuşdur.

Proqramın son günündə Beynəlxalq əlaqələr ofisinin təşkilatçılığı ilə qonaqların Təbiət elmləri və mühəndislik fakültəsinin müəllimləri Masoud Mehrizadeh və Mehdi Kiyasatfarın iştirakı ilə Bakı şəhəri Suraxanı qəsəbəsində yerləşən və Hindistanın şimal-qərbindən Xəzər dənizi vasitəsilə “Böyük İpək Yolu” əsasında ticarət etmək üçün gəlmiş zəvvar atəşpərəstlərin mənəvi və dini mərkəzi olan Atəşgah məbədi və Qala Arxeoloji-Etnoqrafik Muzey Kompleksinə ekskursiya səfəri baş tutmuşdur. Qonaqlara bələdçilər tərəfindən ətrafı məlumat verilmişdir.

Proqramın yekunu olaraq, heyətin Xəzər Universitetinin rektoru dosent İradə Xəlilova ilə görüşü baş tutmuş və professor heyəti sertifikatla təltif olunmuşlar.