2022-ci ilin yaz semestrində Xəzər Universitetinin İqtisadiyyat və menecment fakültəsində “Karyera planlaması” kursunun tələbələri maliyyə savadlılıqlarını inkişaf etdirmək məqsədilə Azərbaycan Respublikasının Mərkəzi Bankının İstehlakçılarla iş departamenti Maliyyə savadlılığı şöbəsinin rəisi Xumar Hüseynovanın təşəbbüsü və təşkilatçılığı ilə Mərkəzi Bakın Virtual Təhsil Platformasında (edu.e-cbar.az) “Maliyyə savadlılığı: strategiya, tədris, təhlil”, “Sığortaya giriş”, “İzafi borclanma” və “Uşaqlar və pullar” kurslarını müvəffəqiyyətlə bitirmişlər.

Bu kurslara tələbələrin cəlb edilməsində məqsəd onlara pul qazanmağa başlamazdan əvvəl düzğün pul xərcləməyi öyrətmək olmuşdur.

Bundan əlavə, tələbələr kurs boyu Mərkəzi Bankın İnsan resursları departamentinin İnsan resurslarının planlaşdırılması şöbəsinin aparıcı mütəxəssisi Aynur Əliyeva, Təhsil və inkişaf şöbəsinin rəisi Lalə Ələkbərli, Heyətin idarəedilməsi şöbəsinin rəisi Təranə Həsənlidən gələcək karyeralarında faydalı olacaq tövsiyələr almış, qrup tapşırıqları yerinə yetirmişlər.

Tələbələrə, həmçinin, uğurlu karyera üçün akademik biliklərlə yanaşı, onların yazılı və şifahi kommunikasiya, komandada işləmək, təqdimat, İT və sair bu kimi bacarıqlara malik olmalarının vacibliyi aşılanmışdır. Bundan başqa, tələbələr iş və şəxsi həyatları üçün zəruri olan pozitivlik strategiyaları, habelə, emosional zəkalarını inkişaf etdirəcək vasitələrlə tanış olmuşlar.

Tələbələrə korporativ tədbirlərin daxili kommunikasiyanın artırılmasına təsirini göstərmək üçün "Korportativ səhər yeməyi" də təşkil edilmişdir.

Kursların sonunda tələbələrə sertifikat verilmişdir.