2022-ci il mayın 6-da Xəzər Universiteti Elmi şurasının növbəti iclası keçirildi. İclası universitetin rektoru dosent İradə Xəlilova açaraq, gündəlikdəki məsələləri elmi şura üzvlərinin nəzərinə çatdırdı. Gündəlikdəki ilk iki məsələ ilə bağlı Təbiət elmləri, sənət və texnologiya yüksək təhsil fakültəsinin dekanı Səidə Şərifova məlumat verdi. O, universitetin magistratura tələbələri və doktorantların dissertasiya mövzuları və elmi rəhbərlərinin təsdiqi ilə bağlı məlumatları iclas iştirakçılarının diqqətinə çatdırdı və məsələlər barədə müzakirələr aparıldı.
Sonra universitetin əcnəbi doktorantı Abdul-Rahman Balogunun fəlsəfə doktoru elmi dərəcəsi almaq üçün təqdim etdiyi dissertasiya işinin ilkin müzakirəsinin keçirilməsi haqqında məlumat verildi.
Daha sonra iclasın sədri Dillər və ədəbiyyatlar departamentinin müəllimi Elza İsmayılovanın filologiya, habelə Azərbaycan dili və ədəbiyyatı ixtisası üzrə təhsil alan tələbələr üçün hazırladığı “Koroğlu” dastanının Azərbaycan və Türkiyə variantları Avropada” adlı dərs vəsaitinin dərc olunması üçün təqdim edilməsi barədə iclas iştirakçılarına məlumat verdi və məsələ müzakirəyə çıxarıldı.
Cari məsələlərdə elmi nəşrlərlə bağlı beynəlxalq reytinq göstəricilərinin yaxşılaşdırılması ilə əlaqədar 2022-ci il üzrə Yol Xəritəsi haqqında şura üzvlərinə məlumat verildi, müvafiq bəndlərin icrası ilə bağlı departamentlərin üzərinə düşən öhdəliklər, hesabatların verilməsi tarixləri və s. haqqında müzakirələr aparıldı. Departamentlərə müvafiq tapşırıqlar verildi və məsələnin növbəti elmi şurada bir daha müzakirə edilməsi təklif olundu.
Elmi şuranın gündəliyində duran məsələlər barədə müsbət qərarlar qəbul edildi.