2022-ci il aprelin 29-30-da Bakı Mühəndislik Universiteti və Dövlət Gömrük Komitəsi Akademiyasının təşkilatçılığı ilə Ümummilli lider Heydər Əliyevin anadan olmasının 99-cu ildönümünə həsr olunmuş Gənc Tədqiqatçıların VI Beynəlxalq Elmi konfrans keçirildi.
Konfransda Xəzər Universiteti Psixoloji Xidmət Mərkəzinin rəhbəri, Psixologiya departamentinin koordinatoru Mələk Kərimova "Psixoloqların terapevtik ünsiyyət bacarıqları necə formalaşdırılmalı?" tədqiqatı ilə bağlı çıxış etdi. Bu tədqiqatın məqsədi psixologiya ixtisasında təhsil alan tələbələrin nəzəri biliklərinin praktiki bacarıqlarla möhkəmləndirilməsi məqsədi ilə təşkil edilən “Psixoloji Konsultasiya” dərsinin mahiyyətini təhlil etmək və onların dərslə bağlı öyrəndikləri bacarıqları haqqında kəmiyyət tədqiqatının keçirilməsidir. Tədqiqat Xəzər Universitetinin bakalavr dördüncü kurs tələbələri (n=20) arasında 2021-2022-ci tədris ilində “Psixoloji Konsultasiya” dərsi zamanı aparılmışdır. Dərs “Mikro bacarıqlar təlimi”nə (İvey, 2007) əsaslanılaraq təşkil edilmişdir. Müəllif tədqiqatla bağlı keçirilən dərsin mahiyyətini və tədqiqat nəticələrini əsaslandıraraq, konfransda məruzə etdi.
Mələk Kərimova konfransda "Mediasiya prosesində ünsiyyətin psixoloji əsasları" mövzusu ilə də çıxış edib. O, Azərbaycanda 2021-ci ilin yanvar ayının birindən etibarən tətbiqi başladılan mediasiya prosesi və mediatorların peşə bacarıqlarının inkişaf etdirilməsi ilə əlaqədar danışıqların aparılması zamanı zəruri olan ünsiyyət bacarıqlarına toxunaraq, demokratik cəmiyyət quruculuğunda əhəmiyyətli yeri olan mediasiya prosesinin əsas məqsədləri, mediasiya prosesində ünsiyyətlə bağlı yaranan çətinliklər və mediatorun effektiv ünsiyyət qura bilmə bacarıqlarını formalaşdırması üçün nələrə diqqət edilməsi ilə əlaqəli məsələləri şərh etmişdir.