Azərbaycan Respublikası Dövlət Neft Fondu (ARDNF) növbəti təcrübə proqramına start verib. “Təhlilçi məzun” (Graduate Analyst) təcrübə proqramı çərçivəsində partnyor universitetlərlə işbirliyi əsasında məlumatlandırma və qeydiyyat işlərinə başlanılıb.

Belə ki, bir aylıq “Təhlilçi məzun” proqramına əsasən, sonuncu kurs bakalavr və magistratura tələbələri, həmçinin 2021-ci il universitet məzunları qrup müsahibə sessiyası əsasında təcrübə proqramına qəbul olunaraq, 2022-ci ilin iyun ayı boyu proqram çərçivəsində Fondun İnvestisiya, Risklərin idarə edilməsi, Neft kontraktları, Büdcə proqnozlaşdırma və layihələr, Hesablaşmalar, Təhlükəsizlik, İnsan resursları və Hüquq departamentlərindən birində real iş mühitində, əyani tapşırıqlar üzərində işləməklə müvafiq sahələrdə praktik biliklər qazanmaq imkanı əldə edəcəklər.

ARDNF-nin fəaliyyət istiqamətinin əsasən maliyyə və analitik düşüncəyönümlü olmasını və təcrübə proqramında iştirak edən departamentlərin biznes özəlliyini nəzərə alaraq, proqram çərçivəsində dörd təhsil ocağı - Azərbaycan Dövlət İqtisad Universiteti, ADA Universiteti, Xəzər Universiteti və Azərbaycan-Fransız Universiteti partnyor universitetlər müəyyən olunub. Məzun təcrübəçilərin qeydiyyat və seçim prosesi bu universitetlərlə əməkdaşlıq və iş birliyi əsasında həyata keçirilir.

Təcrübə proqramının yekunları və hesabatlılığı barədə məlumatlar Fondun rəsmi səhifələrində yerləşdiriləcək.

2022-ci il mayın 6-da AZƏRTAC və digər informasiya portalları bu barədə xəbər yayımlamışdır.

https://azertag.az/xeber/Dovlet_Neft_Fondu_novbeti_tecrube_proqramina_start_verib-2124527