2022-ci il aprelin 15-də Xəzər Universitetində Tarix və arxeologiya departamentinin müəllimi, universitetin nəşri olan “Azǝrbaycan arxeologiyası” jurnalının redaksiya heyətinin üzvü, tarix üzrə fəlsəfə doktoru, dosent Roza xanım Arazovanın anadan olmasının 75 illiyi münasibətilə tədbir keçirildi. Tədbirdə universitetin rəhbərliyi, dekanlar, departament müdirləri və mərkəz rəhbərləri iştirak edirdilər.
Rektor İradə Xəlilova çıxışında qeyd etdi ki, Roza xanım Arazova universitet yarandığı ildən fəaliyyətə başlamış, uzun illər Tarix və arxeologiya departamentinin rəhbəri olmuş və hazırda da müəllim kimi işini davam etdirir. O, bu illər ərzində bilik və bacarığını, pedaqoji məharətini yüksək ixtisaslı kadrların hazırlanmasına sərf etmiş və bu gün də bu sahədə qüvvəsini əsirgəmir. Rektor yubilyara gül dəstəsi və hədiyyə təqdim etdi, ona cansağlığı, uzun ömür, işində uğurlar arzuladı. Digər çıxış edənlər də yubilyar haqqında ürək sözlərini söylədilər.
Həmin gün Roza xanım Arazovanın yubileyi Tarix və arxeologiya departamentində də departament müdiri Telman Nüsrətoğlu, əməkdaş və müəllimlərin iştirakı ilə qeyd olundu.