Müsahibəçi: Salam, Ramal. Universitetin Tələbə Məclisinin prezidenti, Humanitar, təhsil və sosial elmlər fakültəsinin Regionşünaslıq ixtisasının tələbəsi kimi işləriniz necədir?

Müsahib: Salam, çox sağolun. Qaydasındadır.

Müsahibəçi: Bu yaxınlarda Xəzər Universitetinin bir qrup əməkdaşı ilə birlikdə Lille şəhərində səfərdə idiniz. İstəyərdik ki, sizinlə bu haqda danışaq. Necə keçdi səfər? Fransa xoşunuza gəldimi?

Müsahib: Bəli. Çox bəyəndim (gülür).

Müsahibəçi: Lille universiteti, ordakı təhsil sistemi ilə bağlı təəssüratlarınızı bizimlə bölüşə bilərsizmi? 

Müsahib: Əlbəttə. Lil universitetinin ucu - bucağı olmayan kampusunda diqqəti cəlb edən cəhətlər çox oldu. Tələbələrin əylənərək öyrənmələri üçün çox rahat şərait yaradılıb. Məsələn, bir mərkəzləri var idi, orada tələbələr simulyasiya oyunları keçirirdilər. Biz də onlara qoşulduq. Oyunun sonunda başa düşdüm ki, çox öyrədici idi.

Müsahibəçi: Nə gözəl! Başqa nələr öyrəndiniz? Məlumat verə bilərsinizmi?

Müsahib: Lil universitetinin professorları tərəfindən verilən təlimlərə qoşulduq. Ömür boyu öyrənmə, tələbələrin biznes fəaliyyətinin inkişafı üçün olan imkanlar, innovatik pedaqogika ilə bağlı yeniliklər... Mən ən çox ömür boyu öyrənmə mərkəzinin fəaliyyətini bəyəndim. Öyrənmək istəyən insanlara universitet tam dəstək verir. Bu çox əladır. İstəyərdim bizim universitetlərimizdə də belə mərkəzlər yaradılsın.

Müsahibəçi: Tələbə Məclisinin prezidenti olaraq hansı nəticələri çıxardınız bu təlimlərdən?

Müsahib: Orada olarkən Karyera Mərkəzinin koordinatoru Elnurə xanımla birlikdə innovativ karyera inkişaf planı hazırladıq. Hal-hazırda da bu planın üzərində işləyirik. Məncə, həyata keçirə bilsək, tələbələr üçün növbəti illərdə yaxş. imkanlar yarana bilər.

Müsahibəçi: Artıq müsahibəmizin sonuna çatmaq üzrəyik. Bizə demək istədiyiniz əlavə nəsə varmı?

Müsahib: Mən Xəzər Universiteti İnkişaf Ofisinə tələbələrə belə fürsətlər yaratdıqları üçün təşəkkür edirəm. Fərqli təhsil sistemini gördükdən sonra biz tələbələrin də öyrənməyə olan baxışı dəyişir. Ümid edirəm, biz öyrəndiyimiz təcrübələri burada tətbiq edə biləcəyik.

Müsahibəçi: Çox sağolun, Ramal. Təşəkkür edirik müsahibə üçün.

Müsahib: Sağolun. Mən də sizə təşükkür edirəm.

Müsahibəçi: Məhin Cəbrayılova