Xəzər Universitetinin İqtisadiyyat və menecment fakültəsində “Mediasiya: nəzəriyyə və praktika” fənnini tədris edən mediator-təlimçi Hüseyn Əliyev Mediasiya Şurasının İxtisas Komissiyasının üzvü təyin olunub. Bu barədə Mediasiya Şurasının İdarə Heyətinin İxtisas və İntizam Komissiyalarının birgə keçirdiyi iclasda qərar qəbul edilib.

H.Əliyev bakalavr təhsilini 2003-2007-ci illərdə Bakı Dövlət Universitetində Beynəlxalq hüquq ixtisası üzrə, magistr təhsilini 2007-2009-cu illərdə Şimali Kipr Türk Respublikasının Girne Amerikan Universitetində Biznesin inzibatçılığı (MBA) istiqaməti üzrə fərqlənmə ilə bitirib. 2011-2012-ci illərdə ABŞ Dövlət Departamentinin Edmund S. Muskie Mübadilə Proqramı (Muskie) çərçivəsində Tuleyn Universitetində təhsil alaraq, Beynəlxalq və müqayisəli hüquq ixtisası üzrə fərqlənmə ilə magistr dərəcəsi alıb.

H.Əliyev Korporativ və kommersiya hüququ üzrə ixtisaslaşaraq, 12 illik peşəkar təcrübəyə malik olan Hüseyn Əliyev hazırda neft-qaz şirkətində hüquq şöbəsinin rəhbəri vəzifəsində çalışır. İxtisas Komissiyasının üzvü təyin olunanadək Mediasiya Şurasının Layihələrin idarə edilməsi işçi qrupunun üzvü kimi fəaliyyət göstərib. O, həmçinin, Azərbaycan Respublikasının Vəkillər Kollegiyasının yeni üzvlərindəndir. H.Əliyev 2012-ci ildən etibarən Bakı Dövlət Universitetində “Mübahisələrin məhkəmədənkənar həlli” və 2022-ci ildən etibarən Xəzər Universitetində “Mediasiya: nəzəriyyə və praktika” fənlərini tədris edir.

2022-ci il martın 29-da Huquq.az və digər saytlar bu barədə xəbər yayımlamışlar.

https://www.e-huquq.az/az/news/mediation/46067.html