2022-ci il martın 22-də “Azərsu” ASC və “Azərsu” ASC-nin yanında İctimai Şuranın birgə təşkilatçılığı ilə Dünya Su Resursları Gününə həsr olunmuş “Qlobal iqlim dəyişmələrinin su ehtiyatlarına təsiri və sudan səmərəli istifadə” mövzusunda onlayn konfrans keçirilmişdir.

Tədbiri giriş sözü ilə açan “Azərsu” ASC yanında İctimai Şuranın sədri Rauf Zeyni bidirib ki, son illər müşahidə olunan iqlim dəyişiklikləri şirin su ehtiyatlarının azalmasına səbəb olub. Əksər dünya ölkələrində, o cümlədən Azərbaycanda da müşahidə olunan bu tendensiyanın təsirlərini azaltmaq üçün hökumət səviyyəsində kompleks tədbirlər görülür. Belə şəraitdə istehlakçıların sudan qənaətlə istifadəsi təşviq edilməlidir və bu işdə vətəndaş cəmiyyətinin üzərinə böyük vəzifələr düşür.

Konfransda çıxış edən BDU-nun prorektoru Fərda İmanov, Xəzər Universitetinin Coğrafiya və ətraf mühit departamentinin müdiri, “Azərsu” ASC yanında İctimai Şuranın üzvü Rövşən Abbasov, Ekologiya və Təbii Sərvətlər Nazirliyinin şöbə müdiri Faiq Mütəllimov, Milli Məclisin üzvü Ceyhun Məmmədov, FHN-nin Su Ehtiyatları Dövlət Agentliyinin şöbə müdiri Sevinc Quliyeva, Meliorasiya və Su Təsərrüfatı ASC-nin aparat rəhbərinin müavini Kənan Abdullayev, “Azərsu” ASC-nin şöbə rəisi Elkin Rüstəmov, BMT-nin Ərzaq və Kənd Təsərrüfatı Təşkilatının (FAO) Azərbaycan nümayəndəliyinin əməkdaşı Aynur Seyidyusif və digər iştirakçılar Azərbaycanın şirin su ehtiyatlarının dinamikası və gözləntilər, suvarmada, sənayedə və məişətdə su ehtiyatlarından səmərəli istifadə və onun təşviqi məsələlərindən ətraflı bəhs ediblər.

Qeyd edək ki, BMT Baş Assambleyasının 22 dekabr 1992-ci il tarixli qətnaməsinə əsasən 1993-cü ildən başlayaraq hər il 22 mart Dünya su resursları günü kimi qeyd olunur.