2022-ci il martın 1-də Xəzər Universitetində Təbiət elmləri və mühəndislik fakultəsinin və Həyat elmləri departamentinin təşkilatçılığı ilə “1 Mart – Ümumdünya Mülki Müdafiə Günü”nə həsr edilmiş tədbir keçirildi.

Tədbirdə Universitetin müəllim heyəti və tələbələri iştirak edirdilər. Universitetinin əməkdaşı, ehtiyatda olan polkovnik-leytenant Mais Talışxanov tədbiri açaraq, tələbələrə Mülki müdafiənin əhəmiyyəti, vəzifələri, fövqəladə hallara (FH) qarşı necə hazırlıqlı olmağın yolları haqqında ümumi məlumat verdi. Sonra tədbiri aparmaq üçün söz Humanitar, təhsil və sosial elmlər fakültəsinin tələbələri Solmaz Mirzəliyeva və Təhmin Bəkirova verildi. Beynəlxalq Mülki Müdafiə Təşkilatının yaranma tarixi və inkişaf yolu, Azərbaycanın bu təşkilatda rolu barədə məlumatı tədbir iştrakçılarına həmin fakültənin tələbəsi Nazənin Nəzərova təqdim etdi.

“1 Mart – Ümumdünya Mülki Müdafiə Günü” hər il bir mövzuya həsr edilir. Bu il isə tədbir tələbə Fatma Heydərovanın hazırladığı “Təbii fəlakətlər və böhranlar zamanı köçkün əhalinin mülki müdafiəsi və idarə edilməsi” mövzusunda təqdimatı ilə davam etdirildi. Bundan sonra tələbə Ləman Əhmədova “Pandemiya ilə mübarizə və könüllülərin rolu” haqqında tədbir iştirakçılarına geniş məlumat verdi.

Tədbirin praktiki hissəsində FH zamanı xilasetmə işlərinə aid olan, insanlara ilk yardım zamanı süni tənəffüsün verilməsi və ürəyin qapalı masajının qaydaları tələbə Günel Əlizadə, qanaxma zamanı ilk yardımın qaydalarını isə tələbə Firüzə Gülməliyeva və Səma Mehtiyeva tərəfindən nümayiş olundu. Bundan sonra tədbir iştirakçılarına sınıqlar zamanı ilk yardım qaydaları tələbə Nəcibə Zeynalova tərəfindən təqdim edildi. Tələbə Solmaz Mirzəliyeva öz növbəsində müasir dövrdə istehsalatda, məişətdə müxtəlif növ kimyəvi maddələr və onların birləşmələrindən istifadənin artması, GTZM – dən mühafizə qaydaları barədə danışdı, onlarla zədələnmə və zəhərlənmələr zamanı ilk yardım göstərilməsı qaydalarının geniş izahını verdi.

FH yaranan dövrdə, müharibə vaxtı, habelə təbii fəlakətlər və güclü istehsalat qəzaları baş verən şəraitdə rabitə və xəbərdarlıq vasitələrindən istifadə və MM siqnalların verilməsini tədbir iştirakçılarına Humanitar, təhsil və sosial elmlər fakültəsinin 3-cü kurs tələbələri Əlixan Balaxanlı və Ləman Əhmədova praktiki göstərdilər. Bununla yanaşı, tələbələr Leyla Sadirova və Sevinc Əbişli tərəfindən KZO istifadə olunan fərdi mühafizə vasitələri haqqında məlumat verildi və həmin vasitələrin istifadə olunması qaydaları nümayiş olundu.

Tədbirin sonunda Həyat elməri departamentinin müəllimləri Zaur Kərimov və Hüseyn Cəfərov tələbələr qarşısında insanların təhlükəsizliyinin təmin olunması, o cümlədən də təbii və texnogen xarakterli fövqəladə hallar zamanı əhalinin mühafizəsinin xüsusi əhəmiyyəti haqqında məlumatlatla çıxış etdilər və onların suallarını cavablandırdılar.