2022-ci il fevralın 23-də Xəzər Universitetində Dillər və ədəbiyyatlar departamentinin təşkilatçılığı ilə Xocalı Soyqırımının 30-cu anım mərasimi keçirildi. Anım mərasimində "Günəşin batdığı yer" bədii-sənədli filmi (ssenari müəllifi şair-dramaturq Eldar İskəndərzadə, rejissoru Elşən Zeynallı) nümayiş olundu və yaradıcı heyətlə görüş keçirildi.

Tədbiri giriş sözü ilə açan Dillər və ədəbiyyatlar departamentinin müdiri, dosent Dilbər Zeynalova Xocalıda baş verənlərin xalqımızın yaddaşına əbədilik həkk olunduğunu, bu soyqırım aktının bəşər tarixinin ən qanlı səhifələrindən biri olduğunu vurğuladı. Sonra "Günəşin batdığı yer" filminin rejissoru Elşən Zeynallı və aktrisa Aybəniz Cahangirova öz təəssüratlarını bölüşdülər. Rejissor və aktrisa filmin çəkilişi prosesində Xocalı faciəsinin sanki şahidi olduqlarını, bu dəhşəti mənən yaşadıqlarını bildirdilər. Xəzər Universitetinin rektoru, dosent İradə Xəlilova Xocalı faciəsinin Azərbaycan xalqının qan yaddaşı olduğunu və Azərbaycan gəncliyinin daima şəhidlırimizin əziz xatirəsini uca tutduğunu vurğuladı. Universitetin İctimai əlaqələr və media üzrə direktoru Əlövsət Əmirbəyli isə o dövrün hadisələrinin mürəkkibliyini, faciənin mahiyyətinin düzgün şərh olunmadığını qeyd etdi. Daha sonra "Günəşin batdığı yer" bədii-sənədli filmi nümayiş etdirildi. Filmdə Xocalıda törədilmiş soyqırım haqqında geniş məlumat öz əksini tapmışdır. Eyni zamanda, Xocalı faciəsinin canlı şahidlərinin təəssüratları fonunda bir daha tədbir iştirakçılarına həmin günün dəhşətləri anladıldı.

Sonda filmin yaradıcı heyəti Xəzər Universitetinin rəhbərliyinə və tədbirin təşkilatçılarına öz təşəkkürlərini bildirdilər.