2021-ci il dekabrın 29-da İqtisadiyyat və menecment departamentinin təşkilatçılığı ilə Xəzər Universitetinin konfrans zalında “Mədəniyyətlərarası səriştə” mövzusunda nəzəri-praktik seminar keçirilmişdir. Tədbiri giriş sözü ilə açan departamentin koordinatoru Asəm Məmmədov seminarda təlimçi qismində iştirak edən turizm üzrə ekspert, “Silk Road School” təhsil müəssisəsinin təsisçisi və direktoru Hüseyn Həsənovu tədbir iştirakçılarına təqdim etmiş, təlimin məqsədi, əldə olunacaq bilik və təcrübə haqqında iştirakçıları məlumatlandırmışdır.

Təlim zamanı son zamanlar vüsət alan qloballaşma kontekstində mədəniyyətlərarası ünsiyyət məfhumunun nəzəri-konseptoloji əsası izah edilmiş, göstərilən təcrübi nümunələrlə iştirakçılarda mədəniyyətlərarası ünsiyyətin əhəmiyyətinə dair dolğun təəssürat yaradılmışdır. “Lewis Model”-i əsasında səciyyəvi xüsusiyyətləri nəzərə alınmaqla xalqların təsnifatı təsvir edilmiş, qeyd olunan model əsasında müxtəlif xalqlar təhlil edilmişdir. Bundan başqa, müxtəlif mədəniyyətlərdən olan insanların qarşılıqlı təması, ünsiyyəti zamanı yaranan sosial-psixioloji prosess “DIEs Technique” əsasında mərhələli şəkildə izah olunmuşdur.

Təlimin davamında xalqlar arasında mədəni müxtəlifliyin sosial həyatda, eləcə də iş mühitində doğura biləcəyi çətinliklər göstərilmiş, belə situasiyaların effektiv idarəsinə dair praktik tövsiyələr verilmişdir.

Yekunda turizm sektorunda mədəni müxtəlifliyin xidmət keyfiyyəti və müştəri məmnuniyyətinə müstəsna təsiri vurğulanmışdır.