2021-ci il dekabrın 27-də Xəzər Universitetində Dillər və ədəbiyyatlar departamentinin təşkilatçılığı ilə “Ələsgərəm, yandım eşq atəşində” adlı ədəbi-bədii gecə keçirildi. Gecəni departamentin müəllimi Dr.Aynur Qəzənfərqızı açdı. Onun Aşıq Ələsgərin yaradıcılığı haqqında qısa məlumatından sonra Dövlət Mədəniyyət və İncəsənət Universitetinin baş müəllimi, sənətşünaslıq üzrə fəlsəfə doktoru Hafiz Kərimov aşıq məclislərinin “Baş divani” havası ilə başlanmasına dair çıxış etdi. Xəzər Universitetinin tələbələrinin ifasında səhnələşdirilmiş “Aşıq Ələsgər və Səhnəbanı” dastanı təqdim olundu.
Dədə Ələsgər İctimai Birliyinin sədri, Aşıq Ələsgərin nəticəsi Xətai Ələsgərli çıxış edərək, aşıq haqqında rəvayətlərdən danışdı və şeirlərini oxudu. O, birlik adından Aşıq Ələsgərin xatirə portretini Humanitar, təhsil və sosial elmlər fakültəsinin dekanı dosent Elza Səmədliyə təqdim etdi.
Tədbirdə AMEA Folklor İnstitutunun əməkdaşları, Mirvarid Dilbazi dərnəyinin nümayəndələri, Şəhid Kərəm Mirzəyev adına Qubadlı rayonunun Xınalıq kəndindəki 1 saylı tam orta məktəbin müəllim və şagirdləri iştirak edirdilər.