2021-ci il dekabrın 22-də Xəzər Universitetində “Teknofest-2021”-in Beynəlxalq Pilotsuz Uçuş Aparatları (PUA) yarışmasının finalçısı olmuş, “İti Qovan” komandasının kapitanı Rəşad Bərəkəti və Fizika və elektronika departamentinin müdiri dosent Fəridə Tatardar tərəfindən Teknofest seminarı keçirildi.

Teknofest - Türkiyə Texnologiya və Sənaye nazirliyinin Selçuk Bayraktarın rəhbərlik etdiyi T3 Vəqfi ilə birgə təşkil etdiyi, dünyanın ən böyük texnologiya festivalıdır. Bu festivalda aviasya şouları, texnologya sərgiləri, Startup sammitləri və exnologiya yarışmaları keçirilir. Fizika və elektronika departamentinin tələbələri 2021 ci il fevral ayının 4-də "İti Qovan" komandası yaradaraq, Türkiyə Sənaye və Texnologiyalar Nazirliyi ilə T3 Vəqfının birgə təşkil etdiyi yarışmada iştirak etmişlər.

Seminarda Teknofestin texnologiya yarışmaları, xüsusilə də PUA yarışmaları barəsində tələbələrə ətraflı məlumat verildi. Məqsəd tələbələrin texnologiya yarışmalarına olan marağını artırmaq idi. Növbəti illərdə Xəzər Universitetinin tələbələrinin bu yarışmada iştirak edə bilməsi üçün onlara tətbiqi mühəndislik və komandada işləmə bacarıqlarının yaradılmasında bu cür yarışların önəmli olduğu açıqlandı. Tədbirə qatılan tələbələr Xəzər Universitetində Mühəndislik klubunun yaradılmasını, tələbələrin orada aktiv olaraq öz ixtisasları üzrə işləmək, həmçinin Türkiyənin Teknofest və dünyada keçirilən digər beynəlxalq yarışmalara da qatılmaq istədiklərini aparılan anket sorğusunda qeyd etdilər.

Seminarın sonunda Xəzər Universitetində Mühəndislik klubunun yaradılması və gələn mövsüm “İti Qovan” komandası ilə yanaşı, klub daxilində yaradılacaq digər komandaların “Teknofest-2022” müsabiqəsində bir neçə kateqoriyada iştirak etmələri müzakirə edildi.