Bakı Biznes Universitetinin koordinatoru, Xəzər Universitetinin də tərəfdaş olduğu Avropa Komissiyası tərəfindən maliyyələşən “ECAR” Erasmus+ layihəsi çərçivəsində 2021-ci noyabrınn 22-26-da il layihə tərəfdaşlarının nümayəndələrindən ibarət heyətin Fransaya səfəri təşkil edilmişdir. Səfərdə Azərbaycan Respublikası Təhsil Nazirliyi və layihənin tərəfdaşı olan Azərbaycan niversitetlərindən prorektor və rəhbər heyətindən ibarət 30 nəfərlik nümayəndə iştirak etmişdir.

Görüşdə Xəzər Universitetini İnkişaf Mərkəzinin rəhbəri Raziyə İsayeva və Təbiət elmləri və mühəndislik fakültəsinin dekanı Fəxrəndə Əlimərdanova təmsil edirdilər. İşgüzar görüşlər Fransa Rektorlar Konfransı (CPU) və Fransa Beynəlxalq Təhsil Mərkəzinin (FEI) təşkilatçılığı ilə həyata keçirilmişdir. Görüşlər çərçivəsində CPU-nun Beynəlxalq əlaqələr üzrə koordinatoru, Rouen Universitetinin keçmiş rektoru Jean Luc Nahel Fransa təhsil sistemi və CPU-nun ali təhsildə rolu barədə ətraflı məlumat verdi. Görüş müddətində qurumun Avropa Birliyindəki təmsilçisi Carle-Bonafous Murat Avropa-Fransa təhsil münasibətləri haqqında ətraflı danışmış, konfransın təsir gücünün yalnız ölkə hüdudları ilə məhdudlaşmadığını vurğulamışdır.

Fransa Beynəlxalq Təhsil Mərkəzinin (FEI) proqram meneceri Marion Poutrel CPU-nun Nizamnaməsi və hüquqi statusu barədə əsas prinsipləri izah etdi. CPU Beynəlxalq Əlaqələr üzrə Komissiyasının sədri, eyni zamanda Toulouse Jean Jaurès Universitetinin rektoru Emmanuelle Garnier CPU-nun təşkilati strukturu, plenar iclas, müxtəlif istiqamətlər üzrə ixtisaslaşmış daimi komissiyalar, müvəqqəti işçi qrupları haqqında məlumat verdi. Məruzəçi, eyni zamanda qeyd etdi ki, CPU-da görüşləri təşkil edən, CPU-nun gündəliyini müəyyənləşdirən 20 rektordan ibarət CP2U adlı daimi heyət fəaliyyət görtərir.

Fransa Ali Təhsil, Tədqiqat və İnnovasiya Nazirliyinin nümayəndəsi Manuel Bouard Azərbaycan Təhsil Nazirliyinin nümayəndəsi Nicat Məmmədli ilə birlikdə Fransa Təhsil Nazirliyi və CPU arasında əməkdaşlıq və koordinasiya məsələləri haqqında iştirakçılarla ətraflı müzakirələr apardılar.

Sonra CPU-da üzvlük, strateji planlama, qərar qəbul etmə prosesləri, maliyyələşmə mexanizmləri və s. kimi məsələlər haqqında fikir mübadiləsi aparıldı.

Tədbirin son günündə Fransanın ən qədim universitetlərindən biri olan Sorbon universitetinə səfər təşkil edildi. Səfərdə iştirak edən Bakı Biznes Universitetinin rektoru İbad Abbasov CPU-nun medalı ilə təltif olundu.

Səfər çərçivəsində Azərbaycan universitetlərindən olan heyət Azərbaycanın görkəmli siyasi və dövlət xadimi, Azərbaycan Xalq Cümhuriyyətinin banilərindən biri və Azərbaycan Xalq Cümhuriyyəti Parlamentinin sədri Əlimərdan bəy Topçubaşov və Ceyhun Hacıbəylinin məzarını ziyarət etdi. Nümayəndə heyəti Azərbaycan-Fransa Mədəniyyət evində keçirilən tədbirdə də oldu.