Xəzər Universitetinin tərəfdaş kimi iştirak etdiyi Avropa Komissiyasının Erasmus+ proqramının MEDİATS layihəsi çərçivəsində Niderland Krallığının Dortrex şəhərində yerləşən Niderland Biznes Akademiyasında 2021-ci il noyabrın 1-dən başlayan təlim və tədris görüşləri davam edir və noyabrın 14-də başa çatacaq.

Təlimdə Xəzər Universitetinin Psixologiya departamentinin müəllimi və doktorantı Nilufər Əlizadə, MBA in Mediation ixtisasının tələbələri Qasım Şalıyev, Zaur Məmmədli, Mehriban Yusifova, Nəzrin Bağırlı və Orxan Məmmədli iştirak edərək, artıq tədris proqramının ilk həftəsini tamamlamışlar. Layihədə Xəzər Universitetinin və Gəncə Dövlət Universitetinin əməkdaşları və tələbələri 8 Noyabr Zəfər Günü münasibətilə məlumat sessiyası keçirmişlər. Xəzər Universitetinin müəllimi Nilufər Əlizadə layihə iştirakçılarına və kordinatorlarına bu tarixi günün əhəmiyyəti və mahiyyəti haqqında məlumat verərək, bunun nəinki Zəfər bayramı, həm də beynəlxalq ədalətin və qanunların bərpa olunduğu gün olduğunu da qeyd etmişdir. MEDIATS layihəsinin əsas məqsədi universitetləri mediasiya sahəsində aparıcı qüvvələrə çevirməklə Azərbaycan, Gürcüstan və Ukraynada Avropa təcrübəsindən faydalanaraq, münaqişələrin məhkəməyə qədər obyektiv həllini yaxşılaşdırmaqdan ibarətdir. Təlimlərin əsas hissəsi intensiv seminarlara və praktiki məşqlərə həsr olunmuşdur. İki həftə davam edən seminar-məşğələdən sonra iştirakçılar təcrübə proqramının yekunu olaraq imtahan verəcək, uğurlu nəticə olduğu halda beynəlxalq diploma layiq görüləcəklər.