2021-ci il sentyabrın 24-25-də Xəzər Universitetinin İngilis dili və ədəbiyyatı departamenti Dil, Ədəbiyyat və Dilçilik fəlsəfəsi üzrə (ICPL) 2-ci Beynəlxalq Konfransını keçirdi. Konfrans hibrid formada - onlayn və ənənəvi şəkildə baş tutdu. Konfrans Xəzər Universitetinin İngilis dili və ədəbiyyatı departamenrinin əməkdaşları və tələbələrinin, The Englishers LLL International və tədbiri dəstəkləyən bir sıra əməkdaş universitetlərin - Ankara Universiteti, Van Yüzüncü Yıl Universiteti (Türkiyə), Bəlucistan Universiteti, Azad Cammu və Kəşmir Universiteti (Pakistan), Sakatekas Müəllimlərin Təkmilləşdirmə Mərkəzi (Meksika) və Təbriz Universitetinin (İran) əməkdaşlarının birgə əməyi ilə hazırlanmışdı.

Konfransa təqdim olunan 200-ə yaxın məqalə tezisindən 140-ı seçilərək, qəbul edilmişdi. Konfransın açılışı Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlının Dilin təbiəti mövzusunda çıxışı ilə başladı. İngilis dili və ədəbiyyatı departamentinin müdiri Dr. Bahman Amani Tələffüz fəlsəfəsi mövzusunda çıxış etdi. Konfrans koordinatoru Milana Abbasova konfransa təqdim olunmuş tədqiqatlar haqqında qısa məlumat verdi. Konfransa əsas məruzəçi kimi beynəlxalq miqyasda tanınmış alimlər - Türkiyədən Dr.Mustafa Latif Emek, Dr. Bülent Cercis Tanrıtanır, Pakistandan Dr. Amra Reza, Englishers LLL International-ın prezidenti Dr.Mehdi Muntazar, Pakistandan Dr.Nadeem Haider Buxari və İtaliyadan Dr. Antonio Taglialatela dəvət olunmuşdular. Onların çıxışları iştirakçılar tərəfindən maraqla dinlənildi.

Konfransda qeyd olundu ki, seçilmiş məqalələr Khazar Journal of Humanities and Social Sciences (“Xəzər Humanitar və Sosial Elmlər Jurnalı”) jurnalının xüsusi sayında dərc olunmaq üçün nəzərdən keçiriləcək.

Sonda iştirakçılara sertifikat təqdim olundu.