2021-ci il sentyabrın 22-də Xəzər Universitetinin rəhbər heyətinin “Fövqəladə hadisələrin nəticələrinin aradan qaldırılması zamanı idarəetmənin təşkili” mövzusunda mülki müdafiə (MM) məşqi keçirilmişdir. Məşqdə Bakı Regional Mərkəzinin Nizami rayonu üzrə Fövqəladə hallar və mülki müdafiə şöbəsinin əməkdaşları, şöbə rəisi polkovnik-leytenant C.Quliyev və şöbənin baş zabiti kapitan M.Vəlibəyov iştirak etmişlər.

Məşqin rəhbəri, Xəzər Universitetinin rektoru dosent İradə Xəlilova tədbir iştirakçılarına məşqin məqsədini çatdırdıqdan sonra şərti siqnalı verərək, məşqin başlanmasını elan etmişdir.

Məşqin keçirilməsində məqsəd rəhbər heyətin və MM qüvvələrinin fövqəladə hadisələr zamanı fəaliyyət göstərməyə hazırlıq səviyyəsini müəyyən etmək, işçilərin fövqəladə hadisələr zamanı davranış qaydaları üzrə biliklərini artırmaq, MM sahəsində normativ sənədlərin tələblərinə əməl olunmasının və MM idarəetmə orqanlarının fövqəladə hallar üzrə komissiyalarının fövqəladə hadisələr zamanı qarşıda duran vəzifələrin yerinə yetirilməsinə hazırlığını yoxlamaq, MM idarəetmə orqanlarına, fövqəladə hallar komissiyalarına, rəhbər heyətə və işçilərə fövqəladə hadisələrin nəticələri aradan qaldırılarkən xilasetmə və digər təxirəsalınmaz işlərin təşkili və operativ olaraq yerinə yetirilməsi üzrə praktiki vərdişlər aşılamaq olmuşdur.

Məşqin gedişində universitetin Fövqəladə hallar komissiyasının sədri və MM qərargahı rəisinin mərüzələri dinlənilmişdir. MM obyektinin rəhbər və komandir-rəis heyətinin fövqəladə hadisələr (şərti şərait) zamanı operativ reaksiya vermə üzrə hazırlıq səviyyəsi yoxlanılmış, fövqəladə halların nəticələrinin aradan qaldırılması zamanı MM orqan və qüvvələrinin idarə edilməsi üzrə bilik və bacarıqlar təkmilləşdirimiş, işçi sənədlərin hazırlanması üzrə bacarıq və vərdişlər aşılanmışdır.

Universitetin mülki müdafiə planında nəzərdə tutulmuş tədbirlər bir daha dəqiqləşdiriləndən sonra məşqin planına uyğun olaraq, təlim vaxtında başa çatmışdır. Sonda məşqin təhlili aparılmışdır.