2021-ci ilin fevral-may aylarında British Council Birləşmiş Krallığın London Metropolitan Universiteti ilə birlikdə Creative Spark Big İdea müsabiqəsi keçirmişdir. Müsabiqəyə Cənubi Qafqaz ölkələri, Mərkəzi Asiya və Ukraynadan ali təhsil müəssisələri və yaradıcı institutlar qatılmışdır.

Müsabiqədə 18-35 yaş arası gənclər öz biznes ideyaları və sahibkarlıq bacarıqlarını inkişaf etdirmək imkanı əldə etdilər. Gənc sahibkarlar dörd kateqoriya üzrə yarışırdılar: İqlim Dəyişikliyi, Rəqəmsal Texnologiya, Sosial Təsir və Kreativlik.

Müsabiqədə Azərbaycandan 69 ideya mübarizə aparırdı. 12 finalçı arasında Xəzər Universitetinin tələbələri iştirak edirdilər. Təbiət elmləri və mühəndislik fakültəsinin tələbələri Təravət Əsgərova və Əbdurrəhman Eminov Sosial Təsir kateqoriyasında “Herguide” ideyası ilə qalib olmuşlar. Səsvermədə 85 000-dən çox insan iştirak etmişdir.

Qaliblər elan olunduqdan sonra 2021-ci il sentyabrın 14-də Britaniyanın Azərbaycandakı səfiri Ceyms Şarp qalib tələbələrlə görüşdü.

Görüşdə Xəzər Universitetinin 4-cü kurs tələbəsi - müsabiqənin ölkə üzrə qalibi Təravət Əsgərova, British Council-ın ölkə üzrə direktoru Summer Xia və Xəzər Universiteti İnkişaf Mərkəzinin rəhbəri Raziyə İsayeva iştirak etdilər.