2021-ci il iyulun 23-də Erasmus+ PICASP layihəsi çərçivəsində “Xəzər regionunda petroqliflərin müqayisəli icmalı” adlı növbəti virtual seminar keçirilib. MİRAS İctimai Birliyi tərəfindən təşkil olunmuş seminar layihənin tərəfdaşları üçün nəzərdə tutulmuş və Azərbaycanın milli-mədəni irsini tanıtmaq məqsədini daşımışdır.
MİRAS İctimai Birliyinin nümayəndəsi Günbel Seyidəhmədova layihənin italiyalı koordinaoturu Oliva Menozzi ilə birlikdə seminarı açaraq, gündəlikdə duran məsələləri iştirakçıların diqqətinə çatdırmışdır. Bundan sonra dəvətli məruzəçilərə söz verilmişdir. Prof. Məlahət Fərəcova, Dr. Nizami Məmmədzadə Azərbaycanda olan tarixi-mədəni mənbələr, Qobustan qayalıqları, qayaüstü rəsmlər, petroqliflər və onların Orta Asiya abidələri ilə uyğunluğu haqqında danışmış və həmçinin adıçəkilən rəsmlərin 3D effekti ilə təsvirini təqdim etmişlər.
Bundan əlavə, Atəşgah Məbədinin və Yanardağ qoruğunun əməkdaşları dövlət mədəni-tarixi irsi olan abidələr haqqında geniş məlumat vermiş və həmçinin virtual tur vasitəsilə abidələrin ərazisini seminar iştirakçılarına göstərmişlər. Bütün təqdimatlar iştirakçılar, xüsusilə avropalı tərəfdaşlar tərəfindən böyük maraqla qarşılanıb və onlar məruzəçilərə müxtəlif suallar ünvanlayıblar.
Xəzər Universitetindən görüşdə Təlim və Tədris Mərkəzinin direktoru Ülkər Bayramova iştirak etmişdir.