2021-ci il iyunun 2-də UniLab layihəsi çərçivəsində Xəzər Universiteti Karyera İnkişaf Mərkəzinin təşkilatçılığı ilə universitetin tələbələri üçün “Dünya” məktəbinin həyətində açıq havada Karyera sərgisi keçirildi.

Sərgidə “Azercell Telekom MMC”, “Azərbaycan Beynəlxalq Bankı”, “SOCAR Polymer”, “EY Azərbaycan”, “DOST Agentliyi”, “AzerCosmos”, “AzerGold MMC”, “Kapital Bank” və “Baker Tilly Azərbaycan” kimi ölkənin aparıcı şirkətləri iştirak etdilər.

Sərgidə tələbələr şirkət nümayəndələri ilə birbaşa görüşmək imkanı əldə edərək, onların işəgötürmə prinsipləri, eyni zamanda iş, təcrübə və könüllülük proqramları haqqında məlumat aldılar.

Sərgi çərçivəsində “AzerCosmos” şirkəti ilə mexanika, elektronika və komputer mühəndisliyi ixtisaslarında təhsil alan tələbələrin, “Azərbaycan Beynəlxalq Bankı” ilə iqtisadiyyat, menecment və komputer mühəndisliyi ixtisaslarında təhsil alan tələbələrin ayrıca görüşü keçirildi. Hər iki görüşdə şirkət və bank nümayəndələri təqdimat keçirdilər və tələbələri maraqlandıran suallara cavab verdilər.