2021-ci il aprelin 23-də Xəzər Universiteti Elmi Şurasının növbəti iclası keçirildi. İclası Universitetin rektoru dosent İradə Xəlilova açaraq, tanınmış pedaqoq, təhsil təşkilatçısı, Xəzər Universiteti və Dünya məktəbinin həmtəsisçisi, Xəzər Universitetinin Elmi Şurasının Humanitar işlər üzrə müşaviri Nailəxanım İsayevanın vəfat etməsinin Xəzər ailəsi üçün böyük itki olduğunu bildirdi. Onun xatirəsi elmi şura üzvləri tərəfindən bir dəqiqəlik sükutla yad edildi.
Rektor Xəzər Universitetinin BMT-nin “Dayanıqlı İnkişaf Məqsədləri”nə əsaslanan “Times Higher Education Impact Rankings 2021” reytinq cədvəlində ölkə üzrə ilk yeri tutması haqqında məlumat verərək, bu münasibətlə hamını təbrik etdi. Başda Keyfiyyətin Təminatı Mərkəzinin direktoru Lyudmila Sotova olmaqla universitetin bu işdə əməyi keçən hər bir əməkdaşına təşəkkür etdi.
Gündəlikdəki birinci məsələ ilə bağlı Təbiət elmləri və mühəndislik fakültəsinin dekanı Fəxrəndə Əlimərdanova, İqtisadiyyat və menecment fakültəsinin dekanı Ceyhun Məmmədov, Humanitar, təhsil və sosial elmlər fakültəsinin dekan müavini Aygün Verdiyeva və Təbiət elmləri, sənət və texnologiya yüksək təhsil fakültəsinin dekanı Səidə Şərifovanın təqdimatı əsasında universiteti bitirən məzunlar haqqında məlumatlar şura üzvlərinə təqdim edildi.
Gündəlikdəki magistratura tələbələrinin tezis mövzuları və elmi rəhbərlərinin təsdiqi ilə bağlı ikinci məsələ haqqında ətraflı məlumat şura üzvlərinin nəzərinə yüksək təhsil fakültələrinin dekanları tərəfindən çatdırıldı. Bildirildi ki, ümumilikdə 61 nəfər magistratura tələbəsinin tezis mövzusu və elmi rəhbərləri müəyyən edilmişdir. Mövzular haqqında qısa məlumat verildi və müzakirələr aparıldı.
Doktorant və dissertantların dissertasiya mövzusu, elmi rəhbərlərinin təsdiqi, ixtisaslarının və təhsil formasının dəyişdirilməsi ilə əlaqədar dördüncü məsələ də müzakirəyə yüksək təhsil fakültələri tərəfindən təqdim edildi.
“Terapevtik ünsiyyətin əsasları" adlı dərs vəsaitinin dərc olunması ilə bağlı məsələnin müzakirəsi ilə əlaqədar müəllif, Psixologiya departamentinin koordinatoru Mələk Kərimova, vəsaitin yazılmasında əsas məqsəd, əhatə etdiyi mövzular, vəsaitə verilən rəylər və s. haqqında məlumatı şura üzvlərinin nəzərinə çatdırdı.
Cari məsələlər kimi fəlsəfə doktoru imtahanlarının keçirilməsi üçün müvafiq ixtisaslar üzrə proqramların hazırlanmasının vacibliyi, departamentlərin fəaliyyəti, ikili dərəcə (dual-degree) proqramlarının yaradılması, “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində xaricdə təhsil alan doktorantlarla iş, magistr və doktorantların seminarlara, layihələrin hazırlanmasına, “Journal Club”-ra cəlb edilməsi və digər mövzularda müzakirələr aparılaraq təkliflər irəli sürüldü.
Müzakirə olunan məsələlərlə bağlı müvafiq qərarlar qəbul edildi.