2021-ci il mayın 7-də Xəzər Universitetinin tərəfdaş olduğu Erasmus+ PICASP layihəsi koordinatorları ilə virtual görüş keçirilmişdir. Görüşdə Xəzər Universitetinin əməkdaşları ilə yanaşı, Azərbaycan Turizm və Menecment Universitetinin və Miras İctimai Birliyinin nümayəndələri də iştirak etmişlər. Görüşün keçirilməsində əsas məqsəd Erasmus+ PICASP layihəsi çəçrivəsində Xəzər Universiteti və Miras İctimai Birliyinin təşkilatçılığı ilə həyata keçirilməsi nəzərdə tutulmuş tədbirləri müzakirə etmək olmuşdur.
Müzakirələr zamanı Azərbaycan Turizm və Menecment Universitetinin də bu tədbirlərə qoşulması və bütün Azərbaycan tərəfdaşlarının tədbirləri birlikdə təşkil etməsi fikri dəstəklənmış və iyun-iyul aylarında keçiriləcək tədbirlərin mövzuları və hədəf qrupları haqqında qərar verilmişdir.
Layihə tərəfdaşları nəzərdən keçiriləcək tədbirlərin planını və gündəliyini hazırlayaraq, yenidən müzakirəyə çıxarmaq və sonra tədbirlərin elanını dərc etmək haqqında razılığa gəlmişlər. Layihə koordinatorları layihə çərçivəsində daha çox hansı mövzuda tədbirlər keçirilməsi haqqında məsləhətlərini vermiş, Azərbaycanda layihə çərçivəsində milli konfransın hazırlığına başlamağı tövsiyə etmişlər.
Görüşdə Xəzər Universitetini Dr. Ceyhun Məmmədov, Ülkər Bayramova, Dr. Bahadır Baysal, Səbinə Quluyeva və Elnurə Əhmədzadə təmsil etmişlər.