2021-ci il mayın 4-də Xəzər Universitetinin Tarix və arxeologiya departamentinin koordinatoru Orxan Zamanov və departamentin müəllimi Zəhra İslamovanın təşkilatçılığı və rəhbərliyi ilə Humanitar, təhsil və sosial elmlər və Təbiət elmləri və mühəndislik fakültələrinin I kurs tələbələri “Hərbi Qənimətlər Parkı”nı ziyarət ediblər.

Tələbələr 44 günlük müharibə dövründə müzəffər ordumuz tərəfindən düşmənin ələ keçirilmiş silah, döyüş və digər hərbi texnikaları, həmçinin mühəndis istehkam qurğularını böyük maraqla izlədilər. “Hərbi Qənimətlər Parkı”na səfər etməkdə əsas məqsəd dövlətimizin gələcəyi olan tələbələrimizi Vətən müharibəsi ərzində şanlı ordumuzun keçdiyi ağır döyüş yolu, hərbi əməliyyatların gedişatı və zəfər qalibiyyətimizin nəticələri ilə əyani surətdə tanış etmək idi. Ziyarətdə müstəqil araşdırmaçı, tarixçi Dövran Abuzərov və AMEA Milli Azərbaycan Tarixi Muzeyinin Vətən Müharibəsi Fondunun müdiri Şəfa Mövsümov də iştirak etmiş, tələbələrə Vətən müharibəsi və Azərbaycanın müzəffər ordusunun həyata keçirdikləri hərbi əməliyyatlar haqqında real faktlarla zəngin məlumatlar vermişlər.