2021-ci il mayın 4-də Xəzər Universitetinin tərəfdaş olduğu Erasmus+ ECAR (Establishment of Rectors Conference in Azerbaijan - Azərbaycanda Rektorlar Assosasiyasının yaradılması) layihəsinin ilk idarəetmə görüşü keçirilmişdir. Layihənin koordinatoru Bakı Biznes Universitetidir və layihədə Azərbaycandan adı qeyd edilmiş universitetlərdən başqa, Azərbaycan Turizm və Menecment Universiteti, Bakı Mühəndsilik Universiteti, Baki Ali Neft Məktəbi, Bakı Avrasiya Universiteti, Azərbaycan Dillər Universiteti, Lənkəran Dövlət Universiteti, Azərbaycan Mədəniyyət və İncəsənət Universiteti, Naxçıvan Universiteti, Azərbaycan Dövlət Pedaqoji Universiteti, Azərbaycan Texniki Universiteti, Azərbaycan Texnologiya Universiteti, Azərbaycan Universiteti və Odlar yurdu Universiteti olmaqla 15 tərəfdaş universitet vardır. Polşa, Belçika, Fransa, İsveç və Litvadan universitetlər və rektorlar assosasiyaları da layihənin tərəfdaşlarıdır.

Layihənin idarəetmə görüşündə layihə tərəfdaşlarının rektorları və əməkdaşları ilə yanaşı, Azərbaycan Respublikası təhsil nazirinin müavini Firudin Qurbanov, Avropa İttifaqi Azərbaycan Nümayəndəliyinin rəhbəri Kestutis Jankauskas, Polşanın Azərbaycandakı səfiri Rafał Poborski, Fransanın Azərbaycandakı səfiri Zacharie Gross, Litvanın Azərbaycandakı səfiri Egidijus Navikas, Azərbaycan Milli Erasmus Ofisinin rəhbəri Pərviz Bağırov iştirak etmişlər..

Bakı Biznes Universitetinin rektoru prof. İbad Abbasovun çıxışı ilə başlayan görüş digər natiqlərin təqdimatları və çıxışları ilı davam etdi. Xəzər Universitetinin rektoru dosent İradə Xəlilova qonaqları salamlayaraq, layihənin işində bütün tərəfdaşlara uğurlar arzıladı. Xəzər Universitetindən görüşdə, həmçinin, İnkişaf Mərkəzinin direktoru Raziyə İsayeva və Təlim və Tədris Mərkəzinin direktoru Ülkər Bayramova iştirak etdilər.

Qeyd edək ki, üç il davam edəcək layihənin əsas məqsədi Azərbaycan Universitetləri Assosasiyasını yaratmaqla universitetlərin birgə fəaliyyətini daha da güclədnriməkdən ibarətdir. Layihə işini 5-6 may tarixlərində də davam etdirəcək və layihədə nəzərdə tutulmuş işlər müzakirə olunacaq, növbəti altı ayda həyata keçiriləcək işlərin planı müəyyənləşdiriləcəkdir.