Xəzər Universiteti Psixologiya departamentinin koordinatoru, Xəzər Psixoloji Xidmət Mərkəzinin rəhbəri psixoloq Mələk Kərimova Azərbaycan Respublikası Ədliyyə Akademiyasının mediasiya təlimi qurumu tərəfindən mediatorların peşə bacarıqlarının artırılması məqsədi ilə keçirilən 4 günlük (16-17-24-25 aprel) “Ailə mediasiyası” təlimlərində iştirak etmişdir.

M.Kərimova ailə münaqişələrinin alternativ həll yolu kimi ələ alınan ailə mediasiyasının aparılma qaydası, ortaya çıxa biləcək maneələr, işin gedişatına müsbət təsir edəcək köməkçi metodlarla yanaşı, praktiki rol oyunlarında iştirak edərək bu sahədə bilik və bacarıqlarını artırmışdır. Təlimlər bu sahədə dərin təcrübələri olan mediatorlar Mehriban Zeynalova və Konstantin Adi-Qavrila tərəfindən keçirilmişdir.
Əlamətdar haldır ki, Xəzər Universitetinin tərəfdaşı olduğu Erasmus+ KA2 layihəsi -“Mediasiya: Təlim və ictimai transformasiya (MEDIATS)” layihəsi ölkəmizdə də tətbiq olunacaq bu prosesə öz töhfəsini verəcək.