Xəzər Universitetinin Elektronika mühəndisliyi tələbələrinin təqdim etdikləri layihə Türkiyədə keçirilən “Teknofest 2021-Uluslararası İnsansız Hava Araçları Yarışması”nda yüksək bal toplayaraq, uğur qazanmışdır. Nəticədə “Xəzər”in komandası bu il 4-cü dəfə keçiriləcək dünyanın ən böyük texnologiya festivallarından olan "Teknofest"ə qatılmaq hüququ qazanmışdır. Belə ki, komanda adı çəkilən festivalda "Beynəlxalq Pilotsuz Uçuş Aparatı" kateqoriyasında həm Azərbaycanı, həm də Xəzər Universitetini təmsil edəcək.
İldən-ilə iştirakçılarının sayı artan "Teknofest"in əsas məqsədi müxtəlif sahələrdə texnologiyanın təkmilləşməsinə, gənclərin bu sahədə özlərini kəşf etməsinə dəstək olmaqdır. Festival Türkiyə Texnologiya Vəqfi, Türkiyə Sənaye və Texnologiya Nazirliyinin birgə dəstəyi ilə təşkil olunur. Festival sentyabrın 21-26-da İstanbulda Atatürk Hava Limanında keçiriləcək.