2021-ci il aprelin 16-da Xəzər Universiteti Inkişaf Mərkəzinin təşkilatçılığı ilə universitetin tərəfdaş olduğu Erasmus+ UniLab layihəsi çərçivəsində növbəti virtual Fokus Qrup Müzakirəsi təşkil edilmişdir. Fokus Qrup Müzakirəsində UniLab layihəsi çərçivəsində hazırlanmış “Mövcud və yeni universitet-biznes əməkdaşlığını inkişaf etdirmək üçün strateji plan” adlı sənədin biznes sektorundan olan görüş iştirakçıları ilə bərabər müzakirəsi keçirilmişdir.
MS TEAMS vasitəsilə keçirilən görüş Təbiət elmləri və mühəndislik fakültəsinin dekanı Dr. Fəxrəndə Əlimərdanovanın iştirakçıları salamlaması ilə başladı. Sonra Təlim və Tədris Mərkəzinin rəhbəri Ülkər Bayramova layihə çərçivəsində hazırlanmış strateji plan haqqında qısa məlumat verdi.
Görüşdə strateji plan, onun ölkəmizdə tətbiqi, işəgötürənlərin starteji planda etmək istədikləri dəyişikliklər, işəgötürənlər ilə universitet tərəfdaşlığı və strateji planın bu tərəfdaşlıqdakı rolu, belə bir strateji sənədin vacibliyi və s. məsələlər haqqında müzakirələr aparıldı. Görüşdə maraqlı təkliflər və yanaşmalar ilə çıxış edən iştirakçılar universitet-biznes tərəfdaşlığının önəmini bir daha vurğuladılar.
Tədbirdə Xəzər Universitetinin əməkdaşları və tələbələri, Azercell Telekom MMC, UNICEF və Beynəlxalq Bankın əməkdaşları iştirak etmişlər.