2021-ci il martın 9-da Xəzər Universitetinin tərəfdaş olduğu Erasmus+ UniLab layihəsi çərçivəsində tərəfdaş universitetlərin növbəti virtual görüşü keçirilmişdir. Görüşü açan layihə koordinatoru Carme Royo gündəlikdə duran məsələləri iştirakçılara təqdim etdi. Bundan sonra layihə çərçivəsində 2021-ci ilin may ayına qədər görüləcək işlər müzakirə edildi.

Layihənin məqsədlərinin və nəticələrinin tərəfdaş universitetlərin əməkdaşları və tələbələri ilə yanaşı, digər universitetlərə və geniş ictimaiyyətə çatdırılması üçün vaxtaşırı informativ seminarların və vorkşopların davam etdirilməsi və həmçinin regional konfransların keçirilməsi tövsiyə olundu.

Həmçinin, layihə çərçivəsində universitet-biznes əməkdaşlığının inkişaf etdirilməsi, tələbələrin karyera imkanlarının təmin edilməsi üçün karyera mərkəzlərinin rolunu əks etdirən akademik məqalələrin də bir tələb kimi ortaya qoylaraq yerinə yetirilməsi layihə tərəfdaşları tərəfindən məsləhət görüldü. Bütün bunlarla yanaşı, Covid-19 pandemiyası səbəbindən layihə çərçivəsində nəzərdə tutulmuş səfərlərin bundan sonra hansı formatda həyata keçiriləcəyi müzakirə olundu.

UniLab layihəsinin virtual görüşündə Xəzər Universiteti Təlim və tədris mərkəzinin direktoru Ülkər Bayramova, İnkişaf mərkəzinin əməkdaşı Səbinə Quluyeva və Karyera mərkəzinin koordinatoru Elnurə Əhmədzadə ilə təmsil olunmuşdur.