2021-ci il fevralın 8-də Italiyanın Ud’A Universitetinin (Università degli Studi G. d’Annunzio di Chieti-Pescara) koordinatoru və Xəzər Universitetinin tərəfdaş olduğu Erasmus+ “Xəzər Bölgəsinin inkişafında universitet-müəssisə əməkdaşlığını həyata keçirmək üçün istehsalat müəssisəsi pilot kursları” – PICASP (617540-EPP-1-2020-1-IT-EPPKA2-CBHE-JP) adlı layihəsinin ilk idarəetmə görüşü keçirilib.
Virtual keçirilən görüşə Azərbaycandan daha bir tərəfdaş universitet – Azərbaycan Turizm və Menecment Universiteti, Azərbaycan Milli Erasmus+ ofisinin əməkdaşları və Miras cəmiyyətinin üzvləri də qoşulmuşlar. Layihədə ümumilikdə altı ölkədən (İtaliya, Polşa, Litva, Rusiya, Qazaxıstan və Azərbaycan) 11 tərəfdaş təşkilat vardır.
Görüşün məqsədi layihə tərəfdaşlarının və layihədə işləyəcək əməkdaşların bir-birini tanıması, layihədə həyata keçiriləcək tədbirlər, layihənin büdcəsi və hesabatların hazırlanması qaydaları haqqında məlumatların çatdırılması olmuşdur. Layihədə təmsil olunan universitetlər haqqında təqdimatlar və layihə koordinatorunun qısa icmalı dinlənilmişdir. Azərbaycan Milli Erasmus+ ofisinin rəhbəri Pərviz Bağırov layihə tərəfdaşlarını təbrik edərək, onlara uğurlar arzulamışdır.
Layihənin virtual görüşündə Xəzər Universitetini İnkiçaf mərkəzinin direktoru Raziyə İsayeva, Təlim və tədris mərkəzinin direktoru Ülkər Bayramova, Karyera mərkəzinin koordinatoru Elnurə Əhmədzadə təmsil etmişlər.