2021-ci il yanvarın 19-da Xəzər Universitetinin tərəfdaş olduğu Erasmus+ UniLab layihəsi çərçivəsində tərəfdaş universitetlərin növbəti virtual görüşü keçirildi. Görüş iştirakçılarını salamlayan Erasmus+ UniLab layihəsinin koordinatoru Carme Royo konsorsiuma yeni qatılan universitet üzvlərini və koordinator təşkilatının üzvlərini iştirakçılara təqdim etdi. Sonra Carme Royo Fokus Qrup Müzakirələrinin keçirilməsi və onun formatına verilmiş tələblərdən danışdı, tərəfdaş universitetləri tədbirləri təşkil edərkən göstərilmiş qaydalara əməl etməyi məsləhət gördü.
Layihənin İspaniyalı tərəfdaşı olan Pompeu Fabra Universitetinin əməkdaşları UniLab çərçivəsində həyata keçirilməsi nəzərdə tutulan starteji plan və modeli iştirakçılara təqdim etdilər və bildirdilər ki, yaxın vaxtlarda hazırlanmış sənəd bütün tərəfdaşların müzakirəsinə veriləcəkdir.
Virtual görüşdə, həmçinin, layihənin keyfiyyət planı və növbəti görüşlərin vaxtı müzakirə olundu. Carme Royo görüşü yekunlaşdıraraq qeyd etdi ki, Covid-19 pandemiyasının yaratdığı çətinliklərə baxmayaraq, layihə öz işini uğurla davam etdirir və bütün tərəfdaşlar işlərini vaxtında yerinə yetirirlər.
UniLab layihəsinin virtual görüşündə Xəzər Universitetini Təlim və tədris mərkəzinin direktoru Ülkər Bayramova təmsil etmişdir.