Xəzər Universiteti Coğrafiya və ətraf mühit departamentinin müdiri Rövşən Abbasov “Azərbaycanın dağ yerlərində bələdiyyə torpaqlarının inteqrasiyalı idarə edilməsi” adlı təlimat kitabçası hazırlamışdır. Bu təlimat kitabçası Almaniya İqtisadi Əməkdaşlıq və İnkişaf üzrə Federal Nazirliyinin maliyyələşdirdiyi və Ekologiya və Təbii Sərvətlər Nazirliyi, İsmayıllı Rayon İcra Hakimiyyəti və Almaniya Beynəlxalq Əməkdaşlıq Cəmiyyəti (GIZ) ilə birlikdə həyata keçirilən “Cənubi Qafqazda biomüxtəlifliyin inteqrasiyalı idarə edilməsi” (IBiS) proqramı çərçivəsində hazırlanmışdır və torpaqların inteqrasiyalı idarə olunması haqqında bilik və təcrübələri paylaşmaq məqsədi daşıyır. Kitabça əsas etibarilə bələdiyyə nümayəndələri, torpaq idarəçiləri, dövlət rəsmiləri və dağlıq bölgələrdə torpaq idarəçiliyinə cəlb edilmiş tərəflər üçün nəzərdə tutulmuşdur. Eyni zamanda, kitabçadan özəl torpaq sahibləri, icma üzvləri, turizm şirkətlərinin menecerləri, tələbələr, elmi işçilər və geniş oxucu kütləsi də istifadə edə bilərlər.