2019-cu il dekabrın 6-da Xəzər Universitetinin Fikrət Əmirov Konfrans-Konsert zalında Humanitar, təhsil və sosial elmlər fakültəsi birinci kurs tələbələrinin universitetin təsisçisi, Direktorlar və Qəyyumlar Şurasının sədri professor Hamlet İsaxanlı ilə görüşü oldu.

Görüş professor Hamlet İsaxanlının həyat və fəaliyyəti haqqında sənədli filmin nümayişi ilə başlandı.

Sonra Musiqi və incəsənət departamentinin müdiri, əməkdar müəllim, pianoçu Zülfiyyə Sadıqovanın bədii rəhbəri olduğu universitetin Kamera orkestrinin müşayiəti ilə Rasimə Seyidcahan Hamlet İsaxanlının sözlərinə Nailəxanım İsayevanın bəstələdiyi “Bakı” mahnısını ifa etdi. Hamlet İsaxanlının sözlərinə Nailəxanım İsayevanın bəstələdiyi “Lalə” mahnısının musiqisinə müəllim Səbinə İsmayılovanın hazırladığı kompozisiya universitetin qızlardan ibarət rəqs qrupu tərəfindən təqdim olundu.

Professor Hamlet İsaxanlıya söz veriləndə tələbələr seçdikləri universitetin qurucusunu alqışlarla qarşıladılar. Professor geniş çıxışında Xəzər Universitetini ölkənin başqa ali təhsil müəssisələrindən fərqləndirən xüsusiyyətləri, təhsil illərindən başlayaraq elmi fəaliyyəti haqqında ətraflı danışdı, həyatının tələbələr üçün maraqlı və ibrətamiz məqamlarından bəhs etdi, onlara tövsiyələrini verdi və suallarını cavablandırdı.

Sonda Humanitar, təhsil və sosial elmlər fakültəsinin dekanı dosent Elza Səmədova görüşün tələbələr üçün əhəmiyyətindən danışdı və professor Hamlet İsaxanlıya təşəkkürünü bildirdi.