2019-cu il sentyabrın 11-də Avropa Şurasının Azərbaycandakı ofisi və Fransa səfirliyinin təşkilatçılığı ilə “Bizim hüquqlarımız, azadlıqlarımız, Avropamız” adlı yüksək səviyyəli konfrans keçirildi. Konfrans Avropa Şurasının 70 illik yubileyi və Fransanın Avropa Şurası Nazirlər Komitəsinə sədirliyi münasibətilə keçirilirdi. Konfransda Avropada insan hüquqları, demokratiya və qanunun aliliyinin təşviqində Avropa Şurasının tarixi rolu, habelə, təşkilat və üzv dövlətlərin qarşılaşdığı hazırkı və gələcək çağırışlar müzakirə olundu.

Konfransın əsas məruzəçiləri qismində Avropa Şurası Parlament Assambleyasının prezidenti Liliane Maury Pasquier və Azərbaycan Respublikasının Ombudsmanı professor Elmira Süleymanova çıxış etdilər. Əsas məruzəçilərin çıxışından sonra konfrans öz işinə panel müzakirə ilə davam etdi. Panel müzakirə Avropa Şurası Parlament Assambleyasındakı Azərbaycan nümayəndə heyətinin sədri Səməd Seyidov; Avropa Şurası İnsan Hüquqları və Qanunun Aliliyi şöbəsinin müdiri Kristos Giakoumopoulos; Azərbaycan Respublikası Xarici İşlər nazirinin müavini Mahmud Məmmədquliyev; Ədliyyə Səmərəliliyi üzrə Avropa Komissiyasının prezidenti İlqar Qurbanov; Avropa Şurası Siyasi Məsələlər Direktortluğunun Etibar Tədbirləri Şöbəsinin müdiri Anna Capello-Brillat, və Türkiyənin Orta Doğu Teknik Universitetinin Avropa məsələləri üzrə müəllimi və hazırda ADA Universitetində qonaq-professor olaraq, çalışan Dr. Ayca Ergünün iştirakı ilə təşkil edilmişdi. Konfrans Xəzər Universitetinin Siyasi elmlər və fəlsəfə departameninin müdiri Dr. Elmar Mustafayevin moderatorluğu ilə baş tutdu.