2019-cu il sentyabrın 2-dən 4-dək Xəzər Universiteti 2019-cu il üçün “Creative Spark” Tərəfdaşlığı Fondunun qaliblərindən biri olaraq, İngiltərənin Oksford şəhərindəki “Creative Spark Oxford” konfransında təmsil olunurdu. Konfransda Xəzər Universiteti adından İnkişaf direktoru Raziya İsayeva iştirak edirdi. Xəbər verdiyimiz kimi, “Creative Spark” Tərəfdaşlıq Fondu Orta Asiyanın üç (Qazaxıstan, Özbəkistan, Qırğızıstan), Cənubi Qafqazın üç (Azərbaycan, Ermənistan, Gürcüstan) ölkəsində və Ukraynada müəssisə bacarıqlarının və yaradıcı iqtisadiyyatın inkişafı üçün institusional tərəfdaşlığı inkişaf etdirmək məqsədilə Böyük Britaniyanın dəstəyilə qurulmuş 5 illik bir proqramdır.

İki günlük konfrans sentyabrın 2-də Queens Kollecdə “xoşgəldin” partisi və tanışlıqla başladı. British Council-ın Təhsil və Cəmiyyətinin regional direktoru cənab Richard Everitt qonaqları salamladı.

Sentyabrın 3-də cənab Everitt-in səmimi qəbulundan sonra Böyük Britaniya Baş nazirinin Ticarət üzrə nümayəndəsi Baronessa Nikolson salamladı. Baronessa Nikolson iştirakçıları qazandıqları nəticələrlə təbrik etdi və bir çox iştirakçı ölkələrdə müsbət təcrübəsindən danışdı. Xüsusilə, o,  Azərbaycana səfəri ilə bağlı təəssüratlarını bildirdi və öz xatirəsini bölüşdü.

Big Idea Challenge Video Pitch müsabiqəsinin (iştirakçı ölkələrin tələbələri arasında keçirilən müsabiqə) nəticələrini London Metropolitan Universitetinin nümayəndəsi Christopher Lane təqdim etdi. Müsabiqənin ölkə çempionu “Sosial təsir” kateqoriyasının qalibi olmuş Azərbaycan Memarlıq və İnşaat Universitetinin tələbəsi oldu.

Günün sonunda fərqli tərəfdaşlıq nümayəndələri öz layihələrini və nəticələrini təqdim etdilər. Xəzər Universiteti üçün yaddaqalan məqam idi ki, Newcastle Universitetinin nümayəndəsi, Yaradıcılıq və İnnovasiya müəllimi Dr. Victoria Mountford-Brown, İqtisadi İslahatların Təhlili Mərkəzi ilə birlikdə həyata keçirdikləri layihə haqqında danışarkən Xəzər Universitetinin tələbələrinin “çox yaradıcı” olduqlarını xüsusi qeyd etdi. Xəzər Universitetinin tələbələri ilin əvvəlində onların təşkil etdikləri müsabiqədə iştirak etmişdilər.

Gün ərzində nümayəndələr öz layihələrini təqdim etdilər, gənc sahibkarlar biznesə başlamaqla bağlı problemləri müzakirə etdilər. Günün Wadham yemək salonunda içki məclisi, şamyeməyi və mükafatlandırma mərasimi ilə davam etdi. Şamyeməyi zamanı, kateqoriyalar üzrə və beynəlxalq bir yarışmalarda qalib olmuş tələbələr mükafatlandırıldılar.

Sentyabrın 4-də hər ölkənin nümayəndəsi Milli Siyasətin İnkişafı, Tərəfdaşlığın Davamlılığı və “Creative Spark”Layihələrində İnnovasiya ilə bağlı fikirləri inkişaf etdirmək üçün bir komandaya qoşuldular. Müzakirələrdən sonra, nümayəndələr iştirakçıların fikirləri ilə dəstəklənmiş və inkişaf etdirilmişfikirləri təqdim etdilər, Bağlanış sessiyasından sonra bir çoxiştirakçı Beynəlxalq Sahibkarlıq Təlimçiləri Konfransı üçün Oxforf Brookes Universitetinə getdi.