Xəzər Universitetinin Təbiət elmləri departamentinin müdiri Dr. Asəf Ömərov iyunun 17-21-də Erasmus+ proqramı ilə əlaqədar İtaliyanın Boloniya Universitetində olmuşdur.
İyunun 17-də Asəf Ömərov universitetin Beynəlxalq ofisinin əməkdaşı Sara Piersigilli ilə görüşmüş, Sara Piersigilli Boloniya Universitetinin beynəlxalq layihələri haqqında məlumat vermişdir.
İyunun 18-də “Xəzər”in departament müdiri Fiziologiya departamentinin dosenti Diogo Bucci ilə universitetin İnsan anatomiyası muzeyində olmuş, departamentin müəllim heyəti ilə fikir mübadiləsi aparmışdır.
İyunun 19-da Asəf Ömərov universitetin PhD tələbələrinə Xəzər Universitetinin Həyat elmləri departamentində aparılmış “Antibiotikə davamlı ştamların tədqiqi” mövzusunda mühazirə oxumuş, tələbələrlə fikir mübadiləsi və müzakirələr aparmışdır. Həmin gün universitetin Kimya toksikologiya departamentinin rəhbəri professor Giampiero Pagliuca ilə tanış olmuş, beynəlxalq layihələr haqqında fikir mübadiləsi aparılmışdır. “Xəzər”in əməkdaşı qida maddələrində toksiki, kimyəvi maddələrin, antibiotik qalıqlarının təyini üçün istifadə edilən üsul və avadanlıqlarla tanış olmuş, həmin avadanlıqların iş prinsipləri haqqında məlumatı dinləmişdir.
İyunun 20-də Asəf Ömərov Kənd təsərrüfatı və qida laboratoriyasının əməkdaşı Aleksandra Cesare ilə torpaqda olan bakteriyaların araşdırılması, PZR üçün praymerlərin dizaynı, birgə ortaq layihələrin işlənilməsi, ərzaq təhlükəsizliyi sahəsində birgə işlər və s. haqqında fikir mübadiləsi aparmışdır. Həmin gün universitetin Baytarlıq fakültəsinin iribuynuzlu heyvanların saxlanıldığı innovativ ferması ilə də tanış olmuşdur.
İyunun 21-də Baytarlıq fakültəsinin Farmakologiya departamentinin rəhbəri professor Anna Zaghini`nin müşayiəti ilə fakültənin Anatomiya və Patoloji anatomiya muzeylərində olmuş Asəf Ömərov səfərini başa çatdırmışdır.