2019-cu il iyunun 11-də Xəzər Universitetinin Humanitar, təhsil və sosial elmlər fakültəsinin dekan müavini, İngilis dili və ədəbiyyatı departamentinin 5708.01–“German dilləri” ixtisası üzrə doktorantı Validə Kərimovanın “Noam Xomskinin sintaktik təlimində cümlənin alt və üst qatları konsepsiyası” adlı elmi tədqiqat işinin ilkin müzakirəsi keçirildi. Magistratura, doktorantura və elmi işlər bölməsinin koordinatoru Cabir Məmmədli tədbiri açaraq, doktorantın elmi fəaliyyəti, təqdim edilən sənədləri barədə ətraflı məlumat verdikdən sonra, doktorant öz elmi işinin aktuallığı, elmi yeniliyi, məqsəd və vəzifələri, aprobasiyası, quruluşu və qısa məzmunu ilə bağlı izahat verdi. Sonra doktorant ekspertlərin suallarını cavablandırdı, qeyd olunan irad və təkliflərə münasibət bildirdi.

Dissertasiya işinin müzakirəsində Xəzər Universitetinin əməkdaşları ilə yanaşı, ADU-nun professoru Fəxrəddin Veysəlli (elmi rəhbər), həmin universitetin Qrammatika kafedrasının müdiri professor Arif Hüseynov, İngilis dilinin leksikologiyası və üslubiyyatı kafedrasının dosenti İradə Səmədova, Metodika kafedrasının baş müəllimi Dr. Elmira Əliyeva, Azərbaycan Universitetinin Xarici dillər kafedrasının müdiri Dr. Samirə Məmmədova, AzTV kanalının baş mütəxəssisi Dr. Tariyel Abbasov və başqaları iştirak edirdilər.

Müzakirənin sonunda Validə Kərimovanın “Noam Xomskinin sintaktik təlimində cümlənin alt və üst qatları konsepsiyası” adlı elmi tədqiqat işinin Azərbaycan Respublikası Prezidentinin yanında Ali Attestasiya Komissiyasının tələblərinə cavab verdiyi və filologiya üzrə fəlsəfə doktoru elmi dərəcəsi almaq üçün növbəti mərhələyə keçirilməsinə qərar verildi.