2019-cu il mayın 17-də Azərbaycan Yaradıcılıq Fondunun təsis etdiyi “Ədəbiyyat adamı” mükafatı almış şairə, nasir, publisist, tərcüməçi Aysel Əlizadə Xəzər Universitetində yaradıcı yazı fənninin qonağı oldu. Dillər və ədəbiyyatlar departamentinin müəllimi Qardaşxan Əzizxanlının giriş sözü və tələbə Pinar Məmmədzadənin yazar haqqında təqdimatından sonra açıq dərsin iştirakçıları Aysel Əlizadənin “Janrlar və ədəbi cərəyanlar. Modernizm, postmodernizm, metamodernizm” mövzusunda mühazirəsini dinlədilər. “Azadlıq olmayan yerdə sənət yoxdur,” –deyən A.Əlizadə mövzu ətrafında müzakirələr zamanı irland modernist yazıçısı və şairi Ceyms Avqustin Aloizius Coysun romançılıqda etdiyi dönüşdən söz açaraq, “yaradıcı yazıçı”ları yeni ədəbiyyat yaratmağa çağırdı. O, tələbələrdən Fəridə Həsənli, Sadiq Mirzəyev, Suqra Əliyeva ilə dialoq quraraq, həmçinin, Nəzrin İsmayılova, Səkinə Ələkbərova, Nərmin Səmədovanın mülahizələrini dinlədi, verilən sualları cavablandırdı.

Tələbələrə “Qadın peyğəmbər”, “Erkəklər” (türkcə) və “The Woman” (ingiliscə) adlı kitablarını bağışlayan xanım yazar bu görüşün onun üçün yaxşı bir əsər oxumağa bərabər olduğunu söylədi.