2019-cu il mayın 8-də Xəzər Universitetinin rektoru dosent İradə Xəlilovanın sədrliyi ilə Elmi Şuranın növbəti iclası oldu. İclası giriş sözü ilə açan rektor dosent İradə Xəlilova Elmi Şuranın iclasının gündəliyini iclas iştirakçılarının nəzərinə çatdırdı.

İclasın gündəliyində uyğun olaraq, Təbiət və mühəndislik fakültəsinin dekanı Dr. Hassan Niknafs, İqtisadiyyat və menecment fakültəsinin dekanı Ceyhun Məmmədov və Humanitar, təhsil və sosial elmlər fakültəsinin dekanı dosent Elza Səmədli məzunlar haqqında məlumat verdilər.

Doktorant və dissertantların dissertasiya mövzusu, elmi rəhbərlərinin təsdiqi və ixtisaslarının dəyişdirilməsi haqqında Magistratura, doktorantura və elmi işlər bölməsinin koordinatoru Cabir Məmmədlinin məlumatları dinlənildikdən sonra doktorant və dissertantlar çıxış edərək, öz tədqiqat işləri ilə bağlı ətraflı məlumat verdilər, Elmi Şura üzvlərinin suallarını cavablandırdılar.

Daha sonra Elmi Şura Xəzər Universitetinin müəllimi Ləman Verdiyevanın dosentlik elmi adı alması üçün Azərbaycan Respublikasının Prezidenti yanında Ali Attestasiya Komissiyası qarşısında vəsatət qaldırılması ilə bağlı məsələ müzakirə olundu.

Gündəlikdəki məsələlər haqqında müvafiq qərarlar qəbul edildikdən sonra Elmi Şura üzvləri cari məsələlərlə bağlı müzakirələr apardılar.