2019-cu il aprelin 24-də Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı və İctimai əlaqələr və media üzrə direktor Əlövsət Əmirbəyli İstanbulda yerləşən Maltəpə Universitetində oldular. Universitetin Təhsil fakültəsinin dekanı professor Ramazan Korkmaz qonaqları səmimi salamlayaraq, onlara Maltəpə Universiteti Təhsil fakültəsi haqqında geniş məlumat verdi. Sonra universitetin rektoru professor Şahin Karasar Hamlet İsaxanlını səmimi salamlayaraq, Maltəpə Universitetinin keçmişi, bu günü haqqında danışdı. Sonra iki universitet arasında ikitərəfli əlaqələrin genişləndirilməsi, tələbə-müəllim mübadiləsini özündə əks etdirən rəsmi müqavilə imzalandı. Ş.Karasar Maltəpə Universitetinin hədiyyələrini H.İsaxanlıya təqdim etdi. Professor İsaxanlı Xəzər Universiteti adından hədiyyələrini Maltəpə Universitetinin rektoruna təqdim etdi. Həmin gün Maltəpə Universitetinin rektorluğu tərəfindən Bakıdan gələn qonaqların şərəfinə ziyafət verildi. Ziyafətdə Maltəpə Universitetinin prorektoru professor Betül Çotuksöken, şair-yazar, “Hazana övgü” kitabının çevirməni İmdat Avşar və digər şəxslər iştirak edirdilər.