Xəzər Universitetində Təhsilin idarəetməsi üzrə birinci kurs magistr tələbəsi Abubakari Yuşavu deyir: “Əgər Azərbaycanı bir cümlə ilə xarakterizə etməli olsaydım, deyərdim ki, Azərbaycan hər zaman əlindən gələnin ən yaxşısını etməyə çalışan gözəl insanların gözəl ölkəsidir”.

Abubakari əlavə edir: “Bəxtim gətirdi ki, Facebook-da Xəzər Universitetinin təqaüd proqramı barədə elanı gördüm”. Abubakarinin akademik göstəriciləri və təcrübəsi təhsil haqqı üçün tam təqaüd almağa imkan verirdi.

Abubakari qeyd edir ki, Xəzər Universitetinin akademik mühitindən zövq alır. O, deyir: “Dərs aldığım professorların əksəriyyəti çox yardımçı olur. Onların ofisinə baş çəkməklə, təhsilim və apardığım tədqiqat barədə məsləhətləşə bilirəm və onlar bu işlərdə mənə məmnuniyyətlə kömək edirlər. Müəyyən mövzular üzrə anlayışımızı inkişaf etdirmək üçün qrup müzakirələri çox faydalıdır. Xəzər Universitetində təhsil almaq bəzən çətin olur, lakin təhsil keyfiyyətini nəzərə alsaq, buna dəyər”.

Abubakari bu yaxınlarda “Sosial medianın magistr tələbələrinin təhsilinə təsiri” adlı tədqiqat işini tamamlamışdır. Bu tədqiqat kurs işinin tərkib hissəsidir. O, qeyd edir: “Təhsil məsələləri haqqında kəmiyyət tədqiqatları aparmaq xoşuma gəlir. Vətənim Qanada internet fırıldaqçılığının təhsilə təsiri barədə genişmiqyaslı tədqiqat aparmaq fikrindəyəm”.

Bir çox əcnəbi tələbələr kimi, Abubakari də Azərbaycandakı yeni həyata uyğunlaşma prosesində mədəni şok yaşayıb. O, etiraf edir ki, onun Azərbaycandakı ilk həftəsi çox çətin olub. Abubakari deyir: “Bura ilk gələndə mən mədəni şok yaşadım. Mən salamlaşma üsulumu və jestlərimi dəyişməli oldum, çünki burada səhv anlaşılırdı. Mən ictimai nəqliyyatda xanımlara yer verməyi də öyrəndim”. O, gülərək, belə qeyd edir: “Öyrəndiyim mühüm şeylərdən biri də odur ki, mən küçədə tanımadığım insanlara yaxınlaşıb, onlarla söhbət edə bilmərəm. Mən buna bir dəfə cəhd etdim, amma reaksiya gözlədiyim kimi olmadı”.

“Xəzər Universitetində təhsilimi başa vurduqdan sonra doktorant kimi təhsilimi davam etdirmək istəyirəm. Tədqiqat və müəllimlik mənim ən çox sevdiyim sahələrdir. Mən Qanada ali təhsil kurikulumunun təkmilləşdirilməsində iştirak etmək istəyirəm. Qanada təhsil kurikulumu real bazar ehtiyaclarına cavab vermir və məzunlara öz bacarıqlarına uyğun iş tapmaq çətindir. Bu problemlə məşğul olmaq lazımdır və mən özümü həll prosesinin tərkib hissəsi kimi görürəm,” –deyə Abubakari əlavə edir.

Qeyd edək ki, Abubakari ilə aparılan müsahibə universitetin Beynəlxalq əlaqələr departamentinin icra etdiyi “Xəzər və dünya” layihəsi çərçivəsində baş tutmuşdur. Layihə çərçivəsində Xəzər Universitetinin bir neçə əcnəbi tələbəsindən müsahibə götürülmüşdür.