Yanvarın 25-də Xəzər Universitetinin Mərmər zalında dizayn və Musiqi və incəsənət departamentinin rəssamlıq ixtisasları tələbələrinin sərgi-baxış imtahanı keçirildi. Tədbirdə universitetin rəhbərliyi və əməkdaşları, qonaqlar - Əməkdar incəsənət xadimi, məşhur rəngkar Asif Azərelli, əməkdar rəssam, tanınmış animatorçu Elçin Hami Axundov, Azərbaycan Dövlət Rəssamlıq Akademiyasının müəllimləri və valideynlər iştirak edirdilər

Tədbiri universitetin müəllimi, dizayn ixtisasının koordinatoru Afaq Kərimova açaraq, iştirakçıları salamladı, qonaqları və universitetin dizayn müəllimləri Anar Əsədov, Elvi Kamali və Kamran Əsədovu təqdim etdi, sərginin hazırlanması prosesindən damışdı. Sonra tələbələr öz işləri haqqında izahat verdilər.

Asif Azərelli, Elçin Hami Axundov və digərləri çıxış edərək, tələbələrin işlərini yüksək qiymətləndirdilər və tövsiyələrini bildirdilər.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı sərgi ilə tanış olduqdan sonra tələbələrlə söhbət edərək, işləri haqqında fikirlərini bildirdi, onlara uğurlar arzuladı.