2019-cu il yanvarın 23-də Xəzər Universitetinin İctimai əlaqələr və media şöbəsinin təşkilatçılığı ilə İsmayıllı rayonunda fəaliyyət göstərən “Niyal” Hazırlıq kurslarının 11-ci və Bakı şəhəri 75 saylı orta məktəbin 10-cu və 11-ci sinif şagirdləri ilə (cəmi 52 tələbə və 3 nəfər müəllim) tanıtım xarakterli görüş keçirildi.
Görüşdə Xəzər Universitetin təsisçisi, Direktorlar və Qəyyumlar Şurasının sədri professor Hamlet İsaxanlı, universitetin rektoru Dr. Hassan Niknafs, prorektorlar, dekanlar və departamentlərin nümayəndələri iştirak edirdilər.
İlk növbədə, şagirdlər universitetin laboratoriyaları, sonra isə universitetin kitabxanası və dərs otaqları ilə tanış oldular.
Ümumi ekskursiya bitəndən sonra universitetin “Mərmər” zalında keçirilən görüşü universitetin Psixoloji Xidmət Mərkəzinin direktoru Mələk Kərimova açdı və qonaqları salamladı. Ardınca, şagirdlərə “İxtisas seçimi və motivasiya” mövzusunda təlim keçirildi.
Növbəti hissədə professor Fuat Rəsulov Xəzər Universitetinin tanıtım çarxı ilə əlaqəli video nümayiş etdirməklə yanaşı, Xəzər Universiteti məzunları və onların karyeraları haqqında məlumat verdi. F.Rəsulov, eyni zamanda, müasir gənclərin universitetdə ödənişli və ödənişsiz əsaslarla təhsil almağının mümkünlüyü və üstünlükləri barəsində ətraflı məlumat verdi.
Daha sonra söz universitetin təsisçisi, Direktorlar və Qəyyumlar Şurasının sədri professor Hamlet İsaxanlıya verildi. H.İsaxanlı qısa nitqində Xəzər Universitetində yaradılmış mühitdən, səmimi və şəffaf təhsil alma şəraitindən danışdı.
Yekunda Xəzər Universitetinin rektoru Dr. Hassan Niknafs universitetin beynəlxalq aləmdəki nüfuzunun gündən-günə artdığını, ingilisdilli universitet olmanın üstünlüklərindən bəhs etdi.