2019-cu il yanvarın 27-də Xəzər Universitetinin İqtisadiyyat və Menecment fakültəsi və Milli Mühasiblər Forumunun növbəti seminarı keçirildi. Budəfəki seminarda da mühasibat uçotu sahəsinin tanınmış mütəxəsissləri çıxış edirdilər.

Seminarı giriş sözü ilə açan Milli Mühasiblər Forumunun Təşkilat Komitəsinin sədri Dr. Ruslan Atakişiyev forumun fəaliyyət prinsipləri və tədbirin keçirilməsi məqsədi barəsində iştirakçıları məlumatlandırdı. Daha sonra Xəzər Universitetinin İqtisadiyyat və Menecment fakültəsinin müəllimi Dr. Elsevər İbadov seminar iştirakçılarını salamladı. Xəzər Universitetinin elm və təhsil sahələrindəki fəaliyyətləri və mühasibat uçotunun tədrisi haqqında iştirakçılara məlumat verdi.

Bakı Hesabat Mərkəzinin direktoru Mehdi Babayev “Azərbaycan Respublikası Vergi Məcəlləsində edilən dəyişikliklərin mühasibat uçotuna təsirləri”, İqtisadi Araşdırmalar və Tədris Mərkəzinin vitse-prezidenti Radil Fətullayev “Mənfəət vergisi bəyənnaməsinin və sadələşdirilmiş vergi bəyənnaməsinin 1 nömrəli əlavəsinin tərtibi yolları”, “Mühasibat uçotu” jurnalının baş redaktoru, vergilər üzrə ekspert Əflatun Babayev isə “Azərbaycan Respublikası Vergi Məcəlləsində edilmiş son dəyişikliklərlə bağlı Mühasibat Uçotunun təşkili qarşısında duran yeni vəzifələr” mövzusunda çıxış etdilər.

Daha sonra iştirakçıları maraqlandıran suallar cavablandırıldı, mövzular ətrafında müzakirələr aparıldı. Seminarda bir sıra tanınmış müəssisələrin baş mühasibləri, mühasibləri, maliyyə menecerləri, universitet müəllimləri və tələbələri iştirak edirdilər.

Qeyd edək ki, Xəzər Universitetinin İqtisadiyyat və Menecment fakültəsinin və Milli Mühasiblər Forumunun əməkdaşlığı çərçivəsində təşkil edilən silsilə seminarların hər ay keçirilməsi planlaşdırılır.