Noyabrın 3-4-də Göyçayda ənənəvi XIII Nar festivalı keçirilib. Dövlət və hökumət nümayəndələrinin, Milli Məclisin deputatlarının, xarici ölkələrin Azərbaycandakı səfirlərinin, beynəlxalq təşkilatların və diaspor nümayəndələrinin, yerli və xarici iş adamlarının iştirak etdikləri möhtəşəm nar bayramına Xəzər Universitetinin əməkdaşları da qatılmışdılar. Universitetin İnkişaf mərkəzinin təşkilatçılığı ilə təşkil olunan səfərdə İnkişaf mərkəzinin direktoru Raziyə İsayeva, Multimedia mərkəzinin direktoru Natella Barkaya, Keyfiyyətin təminatı mərkəzinin direktoru Lyudmila Sotova, Fulbrayt proqramı çərçivəsində “Xəzər”də qonaq mühazirəçi olan Qaisar Sultana, xarici mütəxəssis Ronald Wayne Smith və Multimedia mərkəzinin əməkdaşları iştirak edirdilər.

Xəzər Universitetinə məxsus geyimdə olan əməkdaşlar bayramda iştirak etməklə yanaşı, universitetin təbliği ilə də məşğul olmuş, iştirakçılara əyani vəsaitlər paylamışlar. Multimedia mərkəzinin 20-dək əməkdaşı festivalı geniş surətdə əks etdirən çoxlu çəkiliş aparmışlar.