2018-ci il oktyabrın 25-də Dayanıqlı İnkişaf Məqsədlərinin (DİM) həyata keçirilməsində regional tərəfdaşlığın gücləndirilməsi mövzusuna həsr olunmuş VI Bakı Beynəlxalq Humanitar Forumunun rəsmi açılış günündə iştirakçılara DİM-ə dair “Leaving no one behind" (“Heç kimi arxada qoymayaq”) adlı mahnı-klip təqdim olunmuşdur. Mahnını müğənni Turan Eldarova- Namazova ifa etmişdir. Bəstəkar Gülsüm Eldarova, sözlərin müəllifi Nərgiz Eldarovadır.

Mahnı Xəzər Universitetinin Kamera orkestri (bədii rəhbər – universitetin Musiqi və incəsənət departamentinin müdiri, əməkdar müəllim, dosent, pianoçu Zülfiyyə Sadıqova), universitetin tələbələrdən ibarət xor kollektivi və universitetin müəllimi tarzən Ramin Rzayevin ifası ilə müşayiət olunmuşdur.

Bu münasibətlə BMT-dən Xəzər Universitetinə təşəkkür məktubu göndərilmişdir. Məktubu aşağıda dərc edirik.

Xəzər Universitetinə təşəkkür məktubu 

Xəzər Universitetinin təsisçisi,
Direktorlar və Qəyyumlar Şurasının sədri
professor Hamlet İsaxanlıya

Hörmətli Hamlet müəllim!

Bu məktubumla BMT-nin Xəzər Universiteti ilə birgə həyata keçirdiyi uğurlu layihə haqqında sizə məlumat vermək istərdim. 

Dayanıqlı İnkişaf Məqsədlərinə dair "Leaving no one behind" adlı mahnı artıq ictimaiyyətə təqdim olundu:

https://www.youtube.com/watch?v=qk0Pz5A_X64

Fürsətdən istifadə edərək, Xəzər Universitetinin kamera orkestri və xoruna, eləcə də professor Zülfiyyə Sadıqovaya mahnının ərsəyə gəlməsinə verdikləri önəmli töhfəyə görə dərin minnətdarlığımı bildirirəm. 

Qeyd edim ki, mahnının sonunda BMT ilə yanaşı Xəzər Universitetinin də loqosu yerləşdirilib. Bu mahnı ilə bağlı BMT-nin müxtəlif platformalarında yerləşdirilən xəbərlərdə Universitetin töhfəsi xüsusi qeyd olunub. 

Gələn həftə bu mahnı BMT-nin qlobal Twitter (10,6 milyon izləyici) və Facebook (4,1 milyon izləyici) hesablarında da paylaşılacaq. 

Ümid edirəm ki, BMT-nin Xəzər Universiteti ilə faydalı əməkdaşlığı bundan sonra da davam edəcək. 

Hörmətlə,

                                                                                                            Rəşad Hüseynov

BMT-nin İctimai İnformasiya Departamentinin Azərbaycan
təmsilçisi, Xəzər Universitetinin Siyasi elm və Beynəlxalq
münasibətlər departamentinin müəllimi

28 oktyabr 2018-ci il