2018-ci il noyabrın 1-də Meksikanın ən əhəmiyyətli bayramlarından biri olan “Ölülər günü” bayramı Xəzər Universitetində qeyd olundu. “Ölülər günü” vəfat etmiş dost və ailələri anmaq üçün təşkil olunan Meksikanın milli bayramlarından biridir. Bayramla əlaqədar olaraq, Meksikanın Azərbaycandakı səfirliyi Xəzər Universiteti ilə birgə bayram elementi kimi parlaq rəngli ənənəvi folklor kostyumları, skelet başları, kalaka (qadın paltarı geyinən skelet), bayram oyuncaqlarının nümayiş olunduğu stend hazırlamışdı.

Tədbirin birinci hissəsində Xəzər Universitetinin təsisçisi və Direktorlar və Qəyyumlar Şurasının sədri professor Hamlet İsaxanlı Meksikanın Azərbaycandakı səfiri cənab Rodrigo Labardini ilə görüşdü və Xəzər Universitetinin əməkdaşları və tələbələri adından bu bayram münasibətilə səfiri və Meksika xalqını təbrik etdi, sağlamlıq, sülh və firavanlıq arzuladı.

Görüşdən sonra stend qarşısında çıxışına başlayan cənab Rodrigo Labardini qeyd etdi ki, bu bayram “Ölülərin xanımı” kimi tanınan Mictecacihuatl ilahəsinə tez-tez festivallar keçirən azteklərin yerli mədəniyyətinə aiddir. Daha sonra “Ölülər günü” ilə bağlı animasiyalı film Xəzər Universitetinin tələbələri üçün nümayiş etdirildi və filmdən sonra səfir filmin səhnələrini tələbələrlə müzakirə etdi, eyni zamanda, auditoriyanın suallarını cavablandırdı.