Xəzər Universitetinin nəşri olan “Azərbaycan arxeologiyası” jurnalının növbəti sayı (Cild:21, say 1, 2018) çapdan çıxmışdır. Bu sayda Neolit inqilabına xüsusi yer verilmişdir.

Jurnalın bu buraxılışında yerli arxeoloqlarla yanaşı, xarici arxeoloqların da yazılarına yer verilmişdir. Mehmet Özdoğan (İstanbul Universiteti) Neolit dövrünə yenidən tərif verilməsi –zamana uyğun olaraq terminin konseptual dəyişimi –mövzusunda məqalə yazmışdır. Halil Tekin (Ankara Hacettepe Universiteti) Mesopotamiyanın “sirli” Neolit dövrü keramikası haqqında geniş məlumatlar vermişdir. Türkiyədən olan digər arxeoloq Zeynep Eres “(İstanbul Texniki Universiteti) arxeoloji qazıntı, mühafizə etmə, nümayiş etdirmə və cəmiyyətlər arasındakı münasibətlər (Kırklareli abidəsi əsasında) mövzusu əsasında dolğun məlumatlar vermişdir.

Yuxarıda da qeyd etdiyimiz kimi, Neolit inqilabı Azərbaycandan da yan keçməmişdir. Yerli arxeoloqlarımızın da yazıları jurnalda öz əksini tapmışdır. Qüdrət İsmayılovun “Erkən əkinçilik “neolit inqilabı” və Azərbaycan”, Roza Arazovanın “Azərbaycanin qədim əkinçi cəmiyyətlərinin təsərrüfati (əmək alətlərinin eksperimental-trasoloji tədqiqi əsasında)”, Fərhad Quliyevin “Neolit dövründə Cənubi Qafqazda məskunlaşma proseslərinin xronoloji xüsusiyyətləri (Göytəpə və Hacıələmxanlı qədim yaşayış yerlərinin radiokarbon analizləri əsasında)”, Xəqani Alməmmədovun “Cənubi Qafqaz Neolitində yeni sosial-mədəni məkanın –Qarabağın erkən oturaq əkinçi mədəniyyətinin təşəkkülü”, Valeh Ələkbərovun “Neolit dövründə Cənubi Qafqazda keramika istehsalının yaranması və inkişafı”, Tufan Axundovun “Şomutəpə ənənəsinin mənşəyi problemlərinə dair” məqalələri oxucuların ixtiyarına verilmişdir.