2018-ci il oktyabrın 19-da Erasmus Plus “Universitetdə miqrasiya təhsilinin təşviqi” (PROMIG, 573554-EPP-1-2016-1-GE-EPPKA2-CBHE-JP) layihəsi çərçivəsində Xəzər Universitetində İqtisadiyyat və Menecment fakültəsi, İnkişaf və Təlim-tədris mərkəzinin təşkilatçılığı ilə “Miqrasiya və Davamlı İnkişaf” mövzusunda bir günlük məlumatlandırıcı konfrans keçirildi.

Konfransı universitetin rektoru Dr.Hassan Niknafs açaraq, iştirakçıları salamladı və konfransın işinə uğurlar arzuladı. Daha sonra İqtisadiyyat və Menecment fakültəsinin dekanı Dr.Ceyhun Məmmədov PROMIG layihəsində həyata keçirilmiş işlər, fakültədə miqrasiya və iqtisadiyyat üzrə tədris olunan fənlər və aparılan elmi araşdırmalar barədə ətraflı məlumat verdi. Beynəlxalq Miqrasiya Təşkilatının Azərbaycan nümayəndəliyinin əməkdaşı Nərgiz Kərimova dünyada gedən miqrasiya prosesləri və onların statistik nəticələri haqqında təqdimatla çıxış etdi. Xəzər Universitetinin əməkdaşları Dr.Ceyhun Məmmədov, Dr.Şəhriyar Muxtarov və Dr.Rövşən Kərimov apardıqları tədqiqatların nəticələrini konfrans iştirakçıları ilə paylaşdılar və iştirakçıların suallarını cavablandırdılar.

Bundan əlavə, konfransda Xəzər Universiteti, Bakı Mühəndislik Universitetinin tələbələri və Azərbaycan Dövlət İqtisad Universitetinin əməkdaşı professor Məhiş Əhmədov maraqlı təqdimatlarla çıxış etdilər. Həmçinin, Azərbaycan Dillər Universiteti, Azərbaycan Dövlət Pedaqoji Universiteti, Qərbi Kaspi Universiteti, Azərbaycan Texniki Universiteti, Azərbaycan Kooperasiya Universiteti, Bakı Slavyan Universiteti və Azərbaycan Dövlət Neft və Sənaye Universitetinin əməkdaşları da iştirakçı qismində konfransa qatılmışdılar.

Tədbirdə, həmçinin, Xəzər Universitetinin tərəfdaşı olduğu digər iki Erasmus+ layihələri haqqında universitetin İnkişaf Mərkəzinin direktoru Raziyə İsayeva (Beynəlxalq mobilliyə cığır açmaq və hərtərəfli keyfiyyət, uyğunluq və bərabərliyin təminatı) və Politologiya və beynəlxalq münasibətlər departamentinin koordinatoru Elmar Mustafayev (Cənubi Qafqaz və Norveçdə akademik və iş mühitində mədəniyyətlərarası qarşılaşmalar) konfrans iştirakçılarına məlumat verdilər.